Read Gobaith i Gymru Salm 21 Bible Online

Salm 21 - Gobaith i Gymru bible

Salm 21

¹I'r arweinydd cerdd: Salm Dafydd. [1] O ARGLWYDD, mae'r brenin yn llawen am dy fod ti'n ei nerthu; mae'n gorfoleddu'n fawr am dy fod yn rhoi'r fuddugoliaeth iddo!

²Ti wedi rhoi iddo beth oedd e eisiau, wnest ti ddim gwrthod beth oedd e'n gofyn amdano. Saib

³Ti'n ei fendithio â phopeth da, ac yn gosod coron o aur pur ar ei ben.

⁴Gofynnodd i ti ei gadw'n fyw, a dyma ti'n rhoi bywyd iddo — bywyd hir a llinach brenhinol fydd yn aros.

⁵Mae'n enwog am dy fod wedi rhoi'r fuddugoliaeth iddo. Ti wedi rhoi iddo ysblander ac urddas.

⁶Ti wedi rhoi bendithion fydd yn para am byth, a'r boddhad a'r llawenydd o fod yn dy gwmni.

⁷Ydy, mae'r brenin yn trystio'r ARGLWYDD. Mae'n gwybod fod y Duw Goruchaf yn ffyddlon, felly fydd dim byd yn ei ysgwyd.

⁸Byddi'n llwyddo i ddal dy holl elynion; byddi'n rhy gryf i'r rhai sy'n dy gasáu.

⁹Pan fyddi'n dod i'r golwg byddi'n eu llosgi nhw mewn ffwrnais. Mae'r ARGLWYDD yn ddig, a bydd yn eu dinistrio nhw; bydd tân yn eu llosgi nhw.

¹⁰Byddi'n cael gwared â'u disgynyddion o'r ddaear; byddan nhw'n diflannu o blith y ddynoliaeth.

¹¹Roedden nhw eisiau gwneud niwed i ti; roedd ganddyn nhw gynllun ond allen nhw byth lwyddo.

¹²Ti'n gwneud iddyn nhw droi yn ôl drwy gymryd dy fwa ac anelu dy saethau atyn nhw.

¹³Cod, ARGLWYDD! Dangos dy nerth! Byddwn yn canu mawl i ti am wneud pethau mor fawr.