Read Gobaith i Gymru Salm 22 Bible Online

Salm 22 - Gobaith i Gymru bible

Salm 22

¹I'r arweinydd cerdd: Ar yr alaw "Ewig y wawr". Salm Dafydd. [1] Fy Nuw, fy Nuw, pam rwyt ti wedi troi dy gefn arna i? Dw i'n griddfan mewn poen, pam rwyt ti ddim yn fy achub i?

²Fy Nuw, dw i'n galw arnat ti drwy'r dydd, ond dwyt ti ddim yn ateb. Dw i'n dal ati drwy'r nos heb orffwys o gwbl.

³Ti ydy'r Duw Sanctaidd! Rwyt ti'n eistedd ar dy orsedd, ac yn derbyn mawl pobl Israel.

⁴Ti oedd ein hynafiaid ni'n ei drystio. Roedden nhw'n dy drystio di a dyma ti'n eu hachub nhw.

⁵Dyma nhw'n gweiddi arnat ti a llwyddo i ddianc; Roedden nhw wedi dy drystio di, a chawson nhw mo'i siomi.

⁶Dw i'n neb. Pryf ydw i, nid dyn! Dw i'n cael fy wfftio gan bobl, a'm dirmygu.

⁷Dw i'n destun sbort i bawb. Maen nhw'n gwneud ystumiau arna i, ac yn ysgwyd eu pennau.

⁸“Mae e wedi trystio'r ARGLWYDD; felly gadewch i'r ARGLWYDD ei achub, a'i ollwng e'n rhydd! Mae e mor hoff ohono!”

⁹Ti ddaeth â fi allan o'r groth. Ti wnaeth i mi deimlo'n saff ar fron fy mam.

¹⁰Dw i wedi dibynnu arnat ti o'r dechrau cyntaf. Ti ydy fy Nuw i ers i mi gael fy ngeni.

¹¹Paid cadw draw! Mae helyntion gerllaw a does gen i neb i'm helpu.

¹²Mae teirw o'm cwmpas ym mhobman. Mae teirw cryfion Bashan [11] yn fy mygwth.

¹³Maen nhw'n barod i'm llyncu i, fel llewod yn rhuo ac yn rhwygo ysglyfaeth.

¹⁴Dw i bron marw! Mae fy esgyrn i gyd wedi dod o'u lle, ac mae fy nghalon yn wan fel cwyr yn toddi tu mewn i mi.

¹⁵Mae fy egni wedi sychu fel potyn pridd. Mae fy nhafod wedi glynu i dop fy ngheg. Rwyt wedi fy rhoi i lwch marwolaeth.

¹⁶Mae cŵn wedi casglu o'm cwmpas! Criw o fwlis yn cau amdana i ac yn fy nal i lawr gerfydd fy nwylo a'm traed.

¹⁷Dw i'n ddim byd ond swp o esgyrn, ac maen nhw'n syllu arna i a chwerthin.

¹⁸Maen nhw'n rhannu fy nillad rhyngddyn nhw, ac yn gamblo am fy nghrys.

¹⁹O ARGLWYDD, paid ti cadw draw! Ti sy'n rhoi nerth i mi! Brysia! Helpa fi!

²⁰Achub fi rhag y cleddyf! Achub fy mywyd o afael y cŵn!

²¹Gad i mi ddianc oddi wrth y llew! Achub fi rhag cyrn yr ych gwyllt! Ateb fi!

²²Bydda i'n dweud wrth fy mrodyr sut un wyt ti; ac yn canu mawl i ti gyda'r rhai sy'n dy addoli.

²³Ie, chi sy'n addoli'r ARGLWYDD, canwch fawl iddo! Chi ddisgynyddion Jacob, anrhydeddwch e! Chi bobl Israel i gyd, safwch o'i flaen mewn rhyfeddod!

²⁴Wnaeth e ddim dirmygu na diystyru cri'r anghenus; Wnaeth e ddim troi ei gefn arno. Pan oedd yn gweiddi am help, gwrandawodd Duw.

²⁵Dyna pam dw i'n dy foli di yn y gynulleidfa fawr; ac yn cadw fy addewidion o flaen y rhai sy'n dy addoli.

²⁶Bydd yr anghenus yn bwyta ac yn cael digon! Bydd y rhai sy'n dilyn yr ARGLWYDD yn canu mawl iddo — Byddwch yn llawen bob amser!

²⁷Bydd pobl drwy'r byd i gyd yn gwrando ac yn troi at yr ARGLWYDD. Bydd pobl y gwledydd i gyd yn ei addoli,

²⁸am mai'r ARGLWYDD ydy'r Brenin! Fe sy'n teyrnasu dros y cenhedloedd.

²⁹Bydd pawb sy'n iach yn plygu i'w addoli; a phawb sydd ar fin marw — ar wely angau — yn plygu glin o'i flaen!

³⁰ [30-31] Bydd plant yn ei wasanaethu; a bydd enw'r ARGLWYDD yn cael ei gyhoeddi i'r genhedlaeth sydd i ddod. Byddan nhw'n dweud am ei gyfiawnder wrth y rhai sydd ddim eto wedi eu geni! Ie, dweud beth mae e wedi ei wneud!