Read Gobaith i Gymru Salm 25 Bible Online

Salm 25 - Gobaith i Gymru bible

Salm 25

¹Salm Dafydd. [1] O ARGLWYDD, dw i'n troi atat ti mewn gweddi.

²Fy Nuw, dw i'n dy drystio di; paid â'm siomi; paid gadael i'm gelynion gael hwyl ar fy mhen.

³Does neb sy'n dy drystio di yn cael ei siomi. Y rhai sy'n twyllo fydd yn methu, nhw fydd yn cael eu siomi!

⁴Dw i eisiau dy ddilyn di, ARGLWYDD; dysga dy ffyrdd i mi.

⁵Arwain fi ar y ffordd iawn a dysga fi, achos ti ydy'r Duw sy'n fy achub i. Dw i'n dibynnu arnat ti bob amser.

⁶O ARGLWYDD, cofia dy fod yn Dduw trugarog a ffyddlon — un felly wyt ti wedi bod erioed!

⁷Paid dal yn fy erbyn y pechodau a'r holl bethau wnes i o'i le pan oeddwn i'n ifanc. Bydd yn garedig ata i, ARGLWYDD; rwyt ti'n Dduw mor ffyddlon.

⁸Mae'r ARGLWYDD yn dda ac yn hollol deg, felly mae e'n dangos i bechaduriaid sut dylen nhw fyw.

⁹Mae'n dangos y ffordd iawn i'r rhai sy'n plygu iddo ac yn eu dysgu nhw sut i fyw.

¹⁰Mae'r ARGLWYDD bob amser yn ffyddlon, ac mae'r rhai sy'n cadw amodau'r ymrwymiad wnaeth e yn gallu dibynnu'n llwyr arno.

¹¹Er mwyn dy enw da, O ARGLWYDD, maddau'r holl ddrwg dw i wedi ei wneud — mae yna gymaint ohono!

¹²Mae'r ARGLWYDD yn dangos i'r rhai sy'n ffyddlon iddo sut dylen nhw fyw.

¹³Byddan nhw'n mwynhau bywyd, a bydd eu plant yn etifeddu'r tir.

¹⁴Mae'r ARGLWYDD yn rhoi arweiniad i'w ddilynwyr ffyddlon; ac mae'n dysgu iddyn nhw oblygiadau'r ymrwymiad wnaeth e.

¹⁵Dw i'n troi at yr ARGLWYDD am help bob amser, am mai fe sy'n fy ngollwng i'n rhydd o rwyd y gelyn.

¹⁶Tyrd ata i, bydd yn garedig a helpa fi, dw i ar fy mhen fy hun, ac yn dioddef.

¹⁷Achub fi o'r helbul dw i ynddo; gollwng fi'n rhydd o'r argyfwng yma.

¹⁸Edrych arna i'n dioddef mewn poen! Maddau fy holl bechodau!

¹⁹Edrych gymaint o elynion sydd gen i! Maen nhw'n fy nghasáu i, ac am wneud niwed i mi!

²⁰Amddiffyn fi, ac achub fi! Paid gadael i mi gael fy siomi, achos dw i wedi troi atat ti am loches.

²¹Amddiffyn fi, am fy mod i'n onest ac yn agored hefo ti; dw i'n dibynnu arnat ti, ARGLWYDD!

²²O Dduw, gollwng Israel yn rhydd o'i holl drafferthion!