Read Gobaith i Gymru Salm 27 Bible Online

Salm 27 - Gobaith i Gymru bible

Salm 27

¹Salm Dafydd. [1] Mae'r ARGLWYDD yn rhoi golau i mi, ac yn fy achub i; does gen i ofn neb. Mae'r ARGLWYDD fel caer yn fy amddiffyn i, does neb yn fy nychryn.

²Pan oedd dynion drwg yn ymosod arna i i'm llarpio fel ysglyfaeth — nhw (y gelynion oedd yn fy nghasáu), ie, nhw wnaeth faglu a syrthio.

³Petai byddin gyfan yn dod yn fy erbyn i, fyddai gen i ddim ofn. Petai rhyfel ar fin torri allan, byddwn i'n gwbl hyderus.

⁴Gofynnais i'r ARGLWYDD am un peth — dyma beth dw i wir eisiau: Dw i eisiau aros yn nhŷ'r ARGLWYDD am weddill fy mywyd; i ryfeddu ar haelioni'r ARGLWYDD, a myfyrio yn ei deml.

⁵Bydd e'n fy nghuddio i pan dw i mewn perygl; bydda i'n saff yn ei babell; Bydd yn fy ngosod i ar graig ddiogel, allan o gyrraedd y gelyn.

⁶Bydda i'n ennill y frwydr yn erbyn y gelynion sydd o'm cwmpas. Bydda i'n cyflwyno aberthau i Dduw, ac yn gweiddi'n llawen. Bydda i'n canu a chyfansoddi cerddoriaeth i foli'r ARGLWYDD.

⁷O ARGLWYDD, gwranda arna i'n galw arnat ti. Bydd yn garedig ata i! Ateb fi!

⁸Dw i'n gwybod dy fod ti'n dweud, “Ceisiwch fi!” Felly ARGLWYDD, dw i'n dy geisio di!

⁹Paid troi cefn arna i! Paid gwthio fi i ffwrdd. Ti sy'n gallu fy helpu i! Paid gwrthod fi! Paid â'm gadael i. O Dduw, ti ydy'r un sy'n fy achub i!

¹⁰Hyd yn oed petai dad a mam yn troi cefn arna i, byddai'r ARGLWYDD yn gofalu amdana i.

¹¹Dangos i mi sut rwyt ti eisiau i mi fyw, O ARGLWYDD. Arwain fi ar hyd y llwybr iawn, achos mae'r rhai sy'n fy nghasáu yn fy ngwylio i.

¹²Paid gadael i'm gelynion i gael eu ffordd. Mae tystion celwyddog yn codi ac yn tystio yn fy erbyn i.

¹³Ond dw i'n gwybod yn iawn y bydda i'n profi daioni'r ARGLWYDD ar dir y byw!

¹⁴Gobeithia yn yr ARGLWYDD! Bydd yn ddewr ac yn hyderus! Ie, gobeithia yn yr ARGLWYDD!