Read Gobaith i Gymru Salm 33 Bible Online

Salm 33 - Gobaith i Gymru bible

Salm 33

¹Chi rai cyfiawn, canwch yn llawen i'r ARGLWYDD! Mae'n beth da i'r rhai sy'n byw'n gywir ei foli.

²Molwch yr ARGLWYDD gyda'r delyn; canwch iddo ar yr offeryn dectant.

³Canwch gân newydd iddo i gyfeiliant hyfryd a bwrlwm llawenydd.

⁴Achos mae beth mae'r ARGLWYDD yn ei ddweud yn iawn; ac mae'r cwbl mae'n ei wneud yn gywir.

⁵Mae e'n caru beth sy'n deg ac yn gyfiawn; ac mae ei ofal ffyddlon i'w weld drwy'r byd i gyd.

⁶Dwedodd y gair, a dyma'r awyr yn cael ei chreu. Anadlodd, a daeth y sêr a'r planedau i fod.

⁷Mae e'n casglu dŵr y moroedd yn bentwr, ac yn ei gadw yn ei stordai.

⁸Dylai'r byd i gyd barchu'r ARGLWYDD! Dylai pob person byw ei ofni!

⁹Siaradodd, a digwyddodd y peth; rhoddodd orchymyn, a dyna fu.

¹⁰Mae'r ARGLWYDD yn drysu cynlluniau'r cenhedloedd, ac yn rhwystro bwriadau pobloedd.

¹¹Beth mae'r ARGLWYDD yn ei fwriadu sy'n aros. Mae ei gynlluniau e yn para ar hyd y cenedlaethau.

¹²Mae'r genedl sydd a'r ARGLWYDD yn Dduw iddi wedi ei bendithio'n fawr, sef y bobl hynny mae wedi eu dewis yn eiddo iddo'i hun.

¹³Mae'r ARGLWYDD yn edrych i lawr o'r nefoedd; ac mae'n gweld y ddynoliaeth gyfan.

¹⁴Mae'n syllu i lawr o'i orsedd ar bawb sy'n byw ar y ddaear.

¹⁵Mae wedi gwneud pawb yn wahanol, ac mae'n sylwi ar bopeth maen nhw'n ei wneud.

¹⁶Nid byddin fawr sy'n achub y brenin; na'i gryfder ei hun sy'n achub milwr dewr.

¹⁷Dydy march rhyfel ddim yn gallu ennill brwydr; er ei fod mor gryf, dydy e ddim yn gallu achub.

¹⁸Yr ARGLWYDD sy'n gofalu am ei bobl, sef y rhai sy'n credu ei fod e'n ffyddlon.

¹⁹Fe sy'n eu harbed nhw rhag cael eu lladd, ac yn eu cadw nhw'n fyw mewn cyfnod o newyn.

²⁰Mae'n gobaith ni yn yr ARGLWYDD! Fe sy'n ein helpu ni, ac yn darian i'n hamddiffyn.

²¹Fe sy'n ein gwneud ni mor llawen! Dŷn ni'n credu yn ei enw sanctaidd e.

²²O ARGLWYDD, gad i ni brofi dy haelioni, gan ein bod wedi credu ynot ti.