Read Gobaith i Gymru Salm 35 Bible Online

Salm 35 - Gobaith i Gymru bible

Salm 35

¹Salm Dafydd. [1] O ARGLWYDD, delia gyda'r rhai sy'n ymladd yn fy erbyn! Ymosod ar y rhai sy'n ymosod arna i!

²Coda dy darian fach a'r un fawr, a tyrd yma i'm helpu i!

³Defnyddia dy waywffon a dy bicell yn erbyn y rhai sydd ar fy ôl i. Gad i mi dy glywed di'n dweud, “Gwna i dy achub di!”

⁴Rhwystra'r rhai sydd am fy lladd i; coda gywilydd arnyn nhw! Gwna i'r rhai sydd eisiau gwneud niwed i mi droi'n ôl mewn dychryn.

⁵Gwna nhw fel us yn cael ei chwythu i ffwrdd gan y gwynt wrth i angel yr ARGLWYDD ymosod arnyn nhw!

⁶Pan fydd angel yr ARGLWYDD yn mynd ar eu holau, gwna eu llwybr nhw yn dywyll ac yn llithrig!

⁷Roedden nhw wedi gosod rhwyd i'm dal i, a hynny am ddim rheswm! Roedden nhw wedi cloddio twll i mi ddisgyn iddo.

⁸Gwna i drychineb annisgwyl ddod ar eu traws nhw! Gad iddyn nhw gael eu dal yn eu rhwyd eu hunain! Gwna iddyn nhw ddisgyn i lawr i dwll dinistr!

⁹Bydda i, wedyn, yn gallu moli'r ARGLWYDD, a llawenhau am ei fod wedi fy achub i!

¹⁰Bydd y cwbl ohona i'n datgan, “Pwy sy'n debyg i ti, ARGLWYDD? Ti'n achub y gwan rhag un sy'n rhy gryf iddo — achub y gwan a'r diamddiffyn rhag yr un sydd am ddwyn oddi arno.”

¹¹Mae tystion celwyddog yn codi ac yn fy nghyhuddo i ar gam.

¹²Maen nhw'n talu drwg i mi am yr holl ddaioni wnes i! Maen nhw eisiau gweld diwedd arna i.

¹³Pan oedden nhw'n sâl roeddwn i'n gwisgo sachliain, ac yn mynd heb fwyd yn fwriadol. Roeddwn i'n gweddïo drostyn nhw yn ddi-baid.

¹⁴Roeddwn i'n cerdded o gwmpas yn galaru fel y byddwn i'n galaru dros ffrind neu frawd. Roeddwn i'n dal fy mhen yn isel fel un yn galaru ar ôl ei fam.

¹⁵Ond roedden nhw wrth eu boddau pan wnes i faglu! Dyma nhw'n dod at ei gilydd yn fy erbyn — wn i ddim pam — roedden nhw'n llarpio fel anifeiliaid gwylltion.

¹⁶Dynion annuwiol yn gwawdio am sbort, ac yn ceisio dangos eu dannedd!

¹⁷O ARGLWYDD, am faint wyt ti'n mynd i sefyll yna'n gwylio'r cwbl? Achub fi wrth iddyn nhw ymosod arna i; cadw fi'n saff oddi wrth y llewod ifanc!

¹⁸Wedyn bydda i'n diolch i ti yn y gynulleidfa fawr! Bydda i'n dy foli di o flaen tyrfa enfawr o bobl!

¹⁹Paid gadael i'r rhai sy'n elynion heb reswm lawenhau! Nac i'r rhai sy'n fy nghasáu i heb achos wincio ar ei gilydd.

²⁰Dŷn nhw ddim am wneud lles i neb, dim ond cynllwynio yn eu herbyn, a thwyllo pobl ddiniwed.

²¹A dyma nhw'n barod i'm llyncu innau, “Aha! dŷn ni wedi dy ddal di!” medden nhw.

²²O ARGLWYDD, rwyt ti wedi gweld y cwbl! Felly paid cadw draw! Tyrd yma!

²³Symud! Deffra! Amddiffyn fi! Fy Nuw a'm HARGLWYDD, ymladd drosta i!

²⁴Achub fy ngham, O ARGLWYDD fy Nuw, am dy fod ti'n gyfiawn. Paid gadael iddyn nhw ddal ati i wneud sbort.

²⁵Paid gadael iddyn nhw feddwl, “Aha, dyma'n union beth roedden ni eisiau!” Paid gadael iddyn nhw ddweud, “Dŷn ni wedi ei ddinistrio!”

²⁶Rhwystra'r rhai sydd am wneud niwed i mi; coda gywilydd arnyn nhw! Cymer y rhai sydd wedi bod yn gwawdio mor falch a gwisga nhw gyda chywilydd ac embaras!

²⁷Ond gad i'r rhai sydd am i ti achub fy ngham weiddi'n llawen! Gad iddyn nhw allu dweud bob amser, “Yr ARGLWYDD sy'n rheoli! Mae am weld ei was yn llwyddo.”

²⁸Wedyn bydda i'n dweud wrth bawb dy fod ti'n gwneud beth sy'n iawn. Bydda i'n canu mawl i ti drwy'r dydd.