Read Gobaith i Gymru Salm 37 Bible Online

Salm 37 - Gobaith i Gymru bible

Salm 37

¹Salm Dafydd. [1] Paid digio pan mae pobl ddrwg yn llwyddo; paid bod yn genfigennus ohonyn nhw.

²Byddan nhw'n gwywo'n ddigon sydyn, fel glaswellt, ac yn diflannu fel egin gwan.

³Trystia'r ARGLWYDD a gwna beth sy'n dda, Setla i lawr yn y tir a mwynhau ei ffyddlondeb.

⁴Ceisia ffafr yr ARGLWYDD bob amser, a bydd e'n rhoi i ti bopeth wyt ti eisiau.

⁵Rho dy hun yn nwylo'r ARGLWYDD a'i drystio fe; bydd e'n gweithredu ar dy ran di.

⁶Bydd e'n achub dy gam di o flaen pawb! Bydd y ffaith fod dy achos yn gyfiawn mor amlwg a'r haul ganol dydd.

⁷Bydd yn amyneddgar wrth ddisgwyl am yr ARGLWYDD. Paid digio pan wyt ti'n gweld pobl eraill yn llwyddo wrth ddilyn eu cynlluniau cyfrwys.

⁸Paid gwylltio am y peth, na cholli dy dymer. Paid digio. Drwg ddaw iddyn nhw'n y diwedd!

⁹Bydd pobl ddrwg yn cael eu taflu allan, ond bydd y rhai sy'n gobeithio yn yr ARGLWYDD yn meddiannu'r tir!

¹⁰Fydd y rhai drwg ddim i'w gweld yn unman mewn ychydig! Byddi'n edrych amdanyn nhw, ond byddan nhw wedi mynd.

¹¹Ond bydd y rhai sy'n cael eu cam-drin yn meddiannu'r tir, ac yn cael mwynhau heddwch a llwyddiant.

¹²Mae'r rhai drwg yn cynllwynio yn erbyn y rhai sy'n byw yn iawn, ac yn ysgyrnygu eu dannedd fel anifeiliaid gwylltion.

¹³Ond mae'r ARGLWYDD yn chwerthin ar eu pennau! Mae e'n gwybod fod eu tro nhw'n dod!

¹⁴Mae'r rhai drwg yn tynnu eu cleddyfau, ac yn plygu eu bwâu, i daro i lawr y rhai sy'n cael eu gorthrymu ac sydd mewn angen, ac i ladd y rhai sy'n byw'n gywir.

¹⁵Ond byddan nhw'n cael eu trywanu gan eu cleddyfau eu hunain, a bydd eu bwâu yn cael eu torri!

¹⁶Mae'r ychydig sydd gan berson sy'n byw yn iawn yn well na'r holl gyfoeth sydd gan y rhai drwg.

¹⁷Bydd pobl ddrwg yn colli eu grym, ond mae'r ARGLWYDD yn cynnal y rhai sy'n byw yn iawn.

¹⁸Mae'r ARGLWYDD yn gofalu amdanyn nhw bob dydd; mae ganddyn nhw etifeddiaeth fydd yn para am byth.

¹⁹Fydd dim cywilydd arnyn nhw pan mae'n ddyddiau anodd; pan fydd newyn bydd ganddyn nhw ddigon i'w fwyta.

²⁰Ond bydd y rhai drwg yn marw. Bydd gelynion yr ARGLWYDD yn cael eu difa, fel gwellt yn cael ei losgi mewn ffwrn.

²¹Mae pobl ddrwg yn benthyg heb dalu'r ddyled yn ôl; ond mae'r rhai sy'n byw yn iawn yn hael ac yn dal ati i roi.

²²Bydd y bobl mae Duw'n eu bendithio yn meddiannu'r tir, ond y rhai mae'n eu melltithio yn cael eu gyrru i ffwrdd.

²³Mae'r ARGLWYDD yn sicrhau llwyddiant yr un sy'n byw i'w blesio.

²⁴Bydd yn baglu weithiau, ond fydd e ddim yn syrthio ar ei wyneb, achos mae'r ARGLWYDD yn gafael yn ei law.

²⁵Roeddwn i'n ifanc ar un adeg, ond bellach dw i mewn oed. Dw i erioed wedi gweld rhywun sy'n byw yn iawn yn cael ei siomi gan Dduw, na'i blant yn gorfod chwilio am fwyd.

²⁶Mae bob amser yn hael ac yn benthyg i eraill, ac mae ei blant yn cael eu bendithio.

²⁷Tro dy gefn ar ddrwg a gwna beth sy'n dda, a byddi'n saff am byth.

²⁸Mae'r ARGLWYDD yn caru beth sy'n gyfiawn, a dydy e byth yn siomi'r rhai sy'n ffyddlon iddo. Maen nhw'n saff bob amser! Ond bydd plant y rhai drwg yn cael eu gyrru i ffwrdd.

²⁹Bydd y rhai sy'n byw yn iawn yn meddiannu'r tir, ac yn aros yno am byth.

³⁰Mae pobl dduwiol yn dweud beth sy'n ddoeth, ac yn hybu cyfiawnder.

³¹Cyfraith Duw sy'n rheoli eu ffordd o feddwl, a dŷn nhw byth yn llithro.

³²Mae'r rhai drwg yn disgwyl am gyfle i ymosod ar y sawl sy'n byw'n iawn, yn y gobaith o'i ladd;

³³ond fydd yr ARGLWYDD ddim gadael iddo syrthio i'w dwylo; fydd e ddim yn cael ei gondemnio yn y llys.

³⁴Disgwyl am yr ARGLWYDD! Dos y ffordd mae e'n dweud a bydd e'n rhoi'r gallu i ti feddiannu'r tir. Byddi'n gweld y rhai drwg yn cael eu gyrru i ffwrdd.

³⁵Dw i wedi gweld pobl ddrwg, creulon, yn llwyddo ac yn lledu fel coeden ddeiliog yn ei chynefin.

³⁶Ond wedyn wrth basio heibio, sylwais eu bod wedi diflannu! Ro'n i'n edrych, ond doedd dim sôn amdanyn nhw!

³⁷Edrych ar y rhai gonest! Noda'r rhai sy'n byw'n gywir! Mae dyfodol i'r rhai sy'n hybu heddwch.

³⁸Ond bydd y rhai sy'n troseddu yn cael eu dinistrio'n llwyr! Does dim dyfodol i'r rhai drwg!

³⁹Mae'r ARGLWYDD yn achub y rhai sy'n byw'n gywir, ac yn eu hamddiffyn pan maen nhw mewn trafferthion.

⁴⁰Mae'r ARGLWYDD yn eu helpu ac yn eu hachub; mae'n eu hachub o afael pobl ddrwg, am eu bod wedi troi ato i'w hamddiffyn.