Read Gobaith i Gymru Salm 39 Bible Online

Salm 39 - Gobaith i Gymru bible

Salm 39

¹I Iedwthwn [16], yr arweinydd cerdd. Salm Dafydd. [1] Dyma fi'n penderfynu, “Dw i'n mynd i wylio fy hun a pheidio dweud dim byd i bechu. Dw i'n mynd i gau fy ngheg tra dw i yng nghwmni pobl ddrwg.”

²Roeddwn i'n hollol dawel, yn brathu fy nhafod a dweud dim. Ond roeddwn i'n troi'n fwy a mwy rhwystredig.

³Roedd y tensiwn yno i yn mynd o ddrwg i waeth. Roeddwn i'n methu ymatal. A dyma fi'n dweud:

⁴“O ARGLWYDD, beth ydy'r pwynt? faint o amser sydd gen i ar ôl? Bydda i wedi mynd mewn dim o amser!

⁵Ti wedi gwneud bywyd mor fyr. Dydy oes rhywun yn ddim byd yn dy olwg di. Mae bywyd y cryfaf yn mynd heibio fel tarth!” Saib

⁶Mae pobl yn pasio trwy fywyd fel cysgodion. Maen nhw'n casglu cyfoeth iddyn nhw eu hunain, heb wybod pwy fydd yn ei gymryd yn y diwedd.

⁷Beth alla i bwyso arno, felly, O ARGLWYDD? Ti dy hun ydy fy unig obaith i!

⁸Achub fi rhag canlyniadau fy ngwrthryfel. Paid gadael i ffyliaid wneud hwyl ar fy mhen.

⁹Dw i'n fud, ac yn methu dweud dim o achos beth rwyt ti wedi ei wneud.

¹⁰Plîs paid dal ati i'm taro! Dw i wedi cael fy nghuro i farwolaeth bron!

¹¹Ti'n disgyblu pobl mor llym am eu pechodau, er mwyn i'r ysfa i bechu ddiflannu fel gwyfyn yn colli ei nerth. Ydy, mae bywyd pawb fel tarth! Saib

¹²Clyw fy ngweddi, O ARGLWYDD. Gwranda arna i'n gweiddi am help; paid diystyru fy nagrau! Dw i fel ffoadur, yn dibynnu arnat ti. Fel fy hynafiaid dw i angen dy help.

¹³Stopia syllu mor ddig arna i. Gad i mi fod yn hapus unwaith eto, cyn i mi farw a pheidio â bod.