Read Gobaith i Gymru Salm 40 Bible Online

Salm 40 - Gobaith i Gymru bible

Salm 40

¹I'r arweinydd cerdd: Salm Dafydd. [1] Ar ôl disgwyl yn frwd i'r ARGLWYDD wneud rhywbeth, dyma fe'n troi ata i; roedd wedi gwrando arna i'n gweiddi am help.

²Cododd fi allan o'r pwll lleidiog, a'r mwd trwchus. Rhoddodd fy nhraed ar graig, a gwneud yn siŵr fy mod i ddim yn baglu.

³Roedd gen i gân newydd i'w chanu — cân o fawl i Dduw! Bydd llawer o bobl yn gweld beth wnaeth e, ac yn dod i drystio'r ARGLWYDD!

⁴Mae'r un sy'n trystio'r ARGLWYDD wedi ei fendithio'n fawr! Dydy e ddim yn troi am help at bobl sy'n brolio'u hunain ac yn dweud celwydd.

⁵O ARGLWYDD fy Nuw, rwyt ti wedi gwneud cymaint! — gwneud pethau rhyfeddol i gyflawni dy bwrpas ynon ni. Does neb yn gallu dy rwystro di! Dw i eisiau sôn am y pethau hyn wrth bobl eraill, ond mae yna ormod ohonyn nhw i'w cyfrif!

⁶Nid aberth ac offrwm rwyt ti eisiau; Mae hynny'n gwbl amlwg i mi! Dim am aberthau i'w llosgi ac offrymau dros bechod rwyt ti'n gofyn.

⁷ [7-8] Felly dyma fi'n dweud, “O Dduw, dw i'n dod i wneud beth rwyt ti eisiau — fel mae wedi ei ysgrifennu amdana i yn y sgrôl.” Mae dy ddysgeidiaeth di yn rheoli fy mywyd i.

⁹Dw i wedi dweud wrth y gynulleidfa fawr am dy gyfiawnder! Dw i wedi dal dim yn ôl! Ti'n gwybod hynny, O ARGLWYDD.

¹⁰Wnes i ddim cadw'r peth i mi fy hun; ond dweud wrth bawb dy fod ti'n Dduw ffyddlon ac yn achub! Dw i ddim wedi cadw'n dawel am dy ofal ffyddlon di.

¹¹Tyrd, ARGLWYDD, paid atal dy dosturi oddi wrtho i. Dy ofal ffyddlon di fydd yn fy amddiffyn i bob amser.

¹²Mae peryglon di-ben-draw o'm cwmpas i ym mhobman. Mae fy mhechodau wedi fy nal i. Maen nhw wedi fy nallu! Mae mwy ohonyn nhw nag sydd o wallt ar fy mhen! Dw i wedi dod i ben fy nhennyn!

¹³Plîs, ARGLWYDD, achub fi! O ARGLWYDD, brysia i'm helpu!

¹⁴Gwna i'r rhai sydd am fy lladd i deimlo embaras a chywilydd. Gwna i'r rhai sydd am wneud niwed i mi droi yn ôl mewn cywilydd.

¹⁵Gwna i'r rhai sy'n chwerthin ar fy mhen i gael eu cywilyddio a'u dinistrio.

¹⁶Ond gwna i bawb sy'n dy geisio di ddathlu'n llawen! Gwna i'r rhai sy'n mwynhau dy weld ti'n achub ddweud, “Mae'r ARGLWYDD mor fawr!”

¹⁷Dw i mewn angen ac yn ddiamddiffyn, ond mae gan yr ARGLWYDD ei fwriadau ar fy nghyfer. Ti ydy'r un sy'n gallu fy helpu a'm hachub. O fy Nuw, paid oedi!