Read Gobaith i Gymru Salm 41 Bible Online

Salm 41 - Gobaith i Gymru bible

Salm 41

¹I'r arweinydd cerdd: Salm Dafydd. [1] Mae'r un sy'n garedig at y tlawd wedi ei fendithio'n fawr. Bydd yr ARGLWYDD yn ei gadw'n saff pan mae mewn perygl.

²Bydd yr ARGLWYDD yn ei amddiffyn ac yn achub ei fywyd, A bydd yn profi bendith yn y tir. Fydd e ddim yn gadael i'w elynion gael eu ffordd.

³Bydd yr ARGLWYDD yn ei gynnal pan fydd yn sâl yn ei wely, ac yn ei iacháu yn llwyr o'i afiechyd.

⁴“O ARGLWYDD, dangos drugaredd ata i,” meddwn i. “Iachâ fi. Dw i'n cyfaddef mod i wedi pechu yn dy erbyn di.”

⁵Mae fy ngelynion yn dweud pethau cas amdana i, “Pryd mae'n mynd i farw a chael ei anghofio?”

⁶Mae rhywun yn ymweld â mi, ac yn cymryd arno ei fod yn ffrind; ond ei fwriad ydy gwneud drwg i mi, ac ar ôl mynd allan, mae'n lladd arna i.

⁷Mae fy ngelynion yn sibrwd amdana i ymhlith ei gilydd, ac yn cynllwynio i wneud niwed i mi.

⁸“Mae'n diodde o afiechyd ofnadwy; fydd e ddim yn codi o'i wely byth eto.”

⁹Mae hyd yn oed fy ffrind agos — yr un roeddwn i'n ei drystio, yr un fu'n bwyta wrth fy mwrdd i — wedi troi yn fy erbyn i!

¹⁰Felly, O ARGLWYDD, dangos drugaredd ata i; gad i mi godi eto, i mi gael talu'n ôl iddyn nhw!

¹¹Ond dw i'n gwybod fy mod i'n dy blesio di: a fydd y gelyn ddim yn bloeddio ei fod wedi ennill y fuddugoliaeth.

¹²Rwyt ti'n fy nghynnal i am fy mod i'n onest gyda ti. Dw i'n cael aros yn dy gwmni di am byth.

¹³Ie, bendith ar yr ARGLWYDD, Duw Israel, o hyn ymlaen ac i dragwyddoldeb! Amen ac Amen.