Read Gobaith i Gymru Salm 44 Bible Online

Salm 44 - Gobaith i Gymru bible

Salm 44

¹I'r arweinydd cerdd: Mascîl gan Feibion Cora. [1] Dŷn ni wedi clywed, O Dduw, ac mae'n hynafiaid wedi dweud wrthon ni beth wnest ti yn eu dyddiau nhw, ers talwm.

²Gyda dy nerth symudaist genhedloedd, a rhoi ein hynafiaid yn y tir yn eu lle. Gwnaethost niwed i'r bobl oedd yn byw yno, a gollwng ein hynafiaid ni yn rhydd.

³Nid eu cleddyf roddodd y tir iddyn nhw; wnaethon nhw ddim ennill y frwydr yn eu nerth eu hunain. Na! dy nerth di, dy allu di, dy ffafr di tuag atyn nhw wnaeth y cwbl! Roeddet ti o'u plaid nhw.

⁴Ti ydy fy mrenin i, O Dduw; yr un sy'n rhoi'r fuddugoliaeth i bobl Jacob!

⁵Ti sy'n ein galluogi ni i yrru'n gelynion i ffwrdd. Gyda dy nerth di dŷn ni'n sathru'r rhai sy'n ein herbyn.

⁶Dw i ddim yn dibynnu ar fy mwa; ac nid cleddyf sy'n rhoi'r fuddugoliaeth i mi.

⁷Ti sy'n rhoi'r fuddugoliaeth dros y gelyn. Ti sy'n codi cywilydd ar y rhai sy'n ein casáu ni.

⁸Duw ydy'r un i frolio amdano bob amser! Dw i am foli ei enw'n ddi-baid. Saib

⁹Ond bellach rwyt ti wedi'n gwrthod ni, a'n cywilyddio ni! Dwyt ti ddim yn mynd allan gyda'n byddin ni.

¹⁰Ti'n gwneud i ni ffoi oddi wrth ein gelynion. Mae'n gelynion wedi cymryd popeth oddi arnon ni!

¹¹Rwyt wedi'n rhoi fel defaid i'w lladd a'u bwyta. Rwyt wedi'n chwalu ni drwy'r gwledydd.

¹²Rwyt wedi gwerthu dy bobl am y nesa peth i ddim, wnest ti ddim gofyn pris uchel amdanyn nhw.

¹³Rwyt wedi'n dwrdio ni o flaen ein cymdogion. Dŷn ni'n destun sbort i bawb o'n cwmpas.

¹⁴Mae'r cenhedloedd i gyd yn ein gwawdio ni; pobl estron yn gwneud hwyl ar ein pennau ni.

¹⁵Does gen i ddim mymryn o urddas ar ôl. Dw i'n teimlo dim byd ond cywilydd

¹⁶o flaen y gelyn dialgar sy'n gwawdio ac yn bychanu.

¹⁷Mae hyn i gyd wedi digwydd i ni, er na wnaethon ni dy wrthod di na thorri amodau ein hymrwymiad i ti.

¹⁸Dŷn ni ddim wedi bod yn anffyddlon i ti, nac wedi crwydro oddi ar dy lwybrau di.

¹⁹Ac eto rwyt ti wedi'n sathru ni, a'n gadael ni fel adfail lle mae'r siacaliaid yn byw. Rwyt wedi'n gorchuddio ni gyda thywyllwch dudew.

²⁰Petaen ni wedi anghofio enw Duw ac estyn ein dwylo mewn gweddi at ryw dduw arall,

²¹oni fyddai Duw wedi gweld hynny? Mae e'n gwybod beth sy'n mynd trwy'n meddyliau ni!

²²O'th achos di dŷn ni'n wynebu marwolaeth drwy'r amser, dŷn ni fel defaid ar eu ffordd i'r lladd-dy.

²³Symud! O ARGLWYDD, pam wyt ti'n cysgu? Deffra! Paid gwrthod ni am byth!

²⁴Pam wyt ti'n edrych i ffwrdd, ac yn cymryd dim sylw o'r ffordd dŷn ni'n cael ein cam-drin a'n gorthrymu?

²⁵Dŷn ni'n gorwedd ar ein hwynebau yn y llwch, ac yn methu codi oddi ar lawr.

²⁶Tyrd, helpa ni! Dangos dy ofal ffyddlon, a gollwng ni'n rhydd.