Read Gobaith i Gymru Salm 45 Bible Online

Salm 45 - Gobaith i Gymru bible

Salm 45

¹I'r arweinydd cerdd: Mascîl. Ar yr alaw "Y Lilïau" gan Feibion Cora. Cân serch. [1] Mae gen i destun cerdd hyfryd yn fy ysbrydoli. Dw i am adrodd fy marddoniaeth i'r brenin; Mae fy nhafod fel ysgrifbin yn llaw awdur profiadol.

²Ti ydy'r dyn mwya golygus sydd, ac mae dy eiriau mor garedig. Mae'n dangos fod Duw wedi dy fendithio di bob amser.

³Gwisga dy gleddyf ar dy glun, O ryfelwr! Dangos dy ysblander a dy fawredd.

⁴Dangos dy fawredd! Dos allan i ennill buddugoliaeth! Marchoga dros y gwir a thros gyfiawnder. Trwy dy nerth byddi'n cyflawni pethau rhyfeddol!

⁵Bydd dy saethau miniog yn trywanu calonnau dy elynion, a bydd pobloedd yn syrthio wrth dy draed.

⁶Byddi di, O Dduw, yn frenin ar yr orsedd am byth; a byddi di'n teyrnasu mewn ffordd sy'n deg.

⁷Ti'n caru beth sy'n iawn ac yn casáu drygioni; felly mae Duw, ie dy Dduw di, wedi dy eneinio di a thywallt olew llawenydd arnat ti fwy na neb arall.

⁸Mae arogl hyfryd myrr, aloes a casia ar dy ddillad i gyd. Mae offerynnau llinynnol o balasau ifori yn cael eu canu i dy ddifyrru di.

⁹Mae tywysogesau ymhlith dy westeion, ac mae dy briodferch yn sefyll wrth dy ochr, yn gwisgo tlysau o aur coeth Offir. [17]

¹⁰Clyw, o dywysoges! Gwrando'n astud! Anghofia dy bobl a dy deulu.

¹¹Gad i'r brenin gael ei hudo gan dy harddwch! Fe ydy dy feistr di bellach, felly ymostwng iddo.

¹²Bydd pobl gyfoethog Tyrus yn ceisio dy ffafr, ac yn dod ag anrhegion i ti.

¹³Mae'r dywysoges yn anhygoel o hardd, a'i gwisg briodas wedi ei brodio gyda gwaith aur manwl.

¹⁴Mae hi'n cael ei harwain at y brenin, ac mae gosgordd o forynion yn ei dilyn, i'w chyflwyno i ti.

¹⁵Maen nhw'n llawn bwrlwm wrth gael eu harwain i mewn i balas y brenin.

¹⁶Bydd dy feibion yn dy olynu yn llinach dy hynafiaid, ac yn cael eu gwneud yn dywysogion yn y wlad.

¹⁷Bydda i'n coffáu dy enw di ar hyd y cenedlaethau, a bydd pobloedd yn dy ganmol di am byth bythoedd.