Read Gobaith i Gymru Salm 50 Bible Online

Salm 50 - Gobaith i Gymru bible

Salm 50

¹Salm gan Asaff. [1] Mae Duw, y Duw go iawn, sef yr ARGLWYDD, wedi siarad, ac wedi galw pawb drwy'r byd i gyd i ddod at ei gilydd.

²Mae Duw yn dod o Seion, y ddinas harddaf un; mae wedi ymddangos yn ei holl ysblander!

³Mae ein Duw yn dod, a fydd e ddim yn dawel — mae tân yn difa popeth o'i flaen, ac mae storm yn rhuo o'i gwmpas.

⁴Mae'n galw ar y nefoedd uchod, a'r ddaear isod, i dystio yn erbyn ei bobl.

⁵“Galwch fy mhobl arbennig i mewn, y rhai sydd wedi ymrwymo i mi drwy aberth.”

⁶Yna dyma'r nefoedd yn cyhoeddi ei fod yn gyfiawn, am mai Duw ydy'r Barnwr. Saib

⁷“Gwrandwch yn ofalus, fy mhobl! Dw i'n siarad! Gwrando Israel! Dw i'n tystio yn dy erbyn di! Duw ydw i, dy Dduw di!

⁸Dw i ddim yn dy geryddu di am aberthu i mi, nac am gyflwyno offrymau i'w llosgi yn rheolaidd.

⁹Ond does gen i ddim angen dy darw di, na bwch gafr o dy gorlannau —

¹⁰Fi piau holl greaduriaid y goedwig, a'r anifeiliaid sy'n pori ar fil o fryniau.

¹¹Dw i'n nabod pob un o adar y mynydd, a fi piau'r pryfed yn y caeau!

¹²Petawn i eisiau bwyd, fyddwn i ddim yn gofyn i ti, gan mai fi piau'r byd a phopeth sydd ynddo.

¹³Ydw i angen cig eidion i'w fwyta, neu waed bychod geifr i'w yfed? — Na!

¹⁴Cyflwyna dy offrwm diolch i Dduw, a chadw dy addewidion i'r Goruchaf.

¹⁵Galw arna i pan wyt mewn trafferthion, ac fe wna i dy achub di, a byddi'n fy anrhydeddu i.”

¹⁶Ond dyma ddwedodd Duw wrth y rhai drwg: “Pa hawl sydd gen ti i sôn am fy nghyfriethiau, a thrafod yr ymrwymiad wnaethon ni?

¹⁷Dwyt ti ddim eisiau dysgu gen i; dwyt ti'n cymryd dim sylw o beth dw i'n ddweud!

¹⁸Pan wyt ti'n gweld lleidr, rwyt ti'n ei helpu. Ti'n cymysgu gyda dynion sy'n anffyddlon i'w gwragedd.

¹⁹Ti'n dweud pethau drwg o hyd, ac yn twyllo pobl wrth siarad.

²⁰Ti'n cynllwyn yn erbyn dy frawd, ac yn gweld bai ar fab dy fam.

²¹Am fy mod i'n dawel pan wnest ti'r pethau hyn, roeddet ti'n meddwl fy mod i'r un fath â ti! Ond dw i'n mynd i dy geryddu di, a dwyn cyhuddiadau yn dy erbyn di.

²²Felly meddylia am y peth, ti sy'n anwybyddu Duw! Neu bydda i'n dy rwygo di'n ddarnau, a fydd neb yn gallu dy achub di!

²³Mae'r un sy'n cyflwyno offrwm diolch yn fy anrhydeddu i. Bydd y person sy'n byw fel dw i am iddo fyw yn cael gweld Duw yn dod i'w achub.”