Read Gobaith i Gymru Salm 51 Bible Online

Salm 51 - Gobaith i Gymru bible

Salm 51

¹I'r arweinydd cerdd: Salm gan Dafydd, ar ôl i'r proffwyd Nathan fynd ato a'i geryddu am gysgu gyda Bathseba. [22†] [1] O Dduw, dangos drugaredd ata i; rwyt ti mor llawn cariad. Gan dy fod ti mor barod i dosturio, wnei di ddileu y gwrthryfel oedd yno i?

²Golcha'r drygioni ohono i'n llwyr, a pura fi o'm pechod.

³Dw i'n cyfaddef mod i wedi tynnu'n groes, a dw i'n ymwybodol iawn o'm methiant.

⁴Yn dy erbyn di dw i wedi pechu, ie, dim ond ti, a gwneud beth sy'n ddrwg yn dy olwg. Mae beth rwyt ti'n ddweud yn hollol deg, ac rwyt ti'n iawn i'm cosbi i.

⁵Y gwir ydy, ces fy ngeni'n bechadur; roedd y pechod yno pan wnaeth mam feichiogi arna i.

⁶Ond rwyt ti eisiau gonestrwydd y tu mewn; rwyt ti eisiau i mi fod yn ddoeth.

⁷Pura fi ag isop, i'm gwneud yn hollol lân; golcha fi, nes bydda i'n lanach nag eira.

⁸Gad i mi wybod beth ydy bod yn hapus eto; rwyt ti wedi malu fy esgyrn — gad i mi lawenhau eto.

⁹Paid edrych ar fy mhechodau i; dilea'r drygioni i gyd.

¹⁰Crea galon lân yno i, O Dduw; a rhoi ysbryd penderfynol i mi unwaith eto.

¹¹Paid taflu fi i ffwrdd oddi wrthot ti, na chymryd dy Ysbryd Glân oddi arna i.

¹²Gad i mi brofi'r wefr eto o gael fy achub gen ti; a gwna fi'n awyddus i fod yn ufudd i ti.

¹³Wedyn bydda i'n dysgu'r rhai sy'n gwrthryfela i dy ddilyn di, a bydd pechaduriaid yn troi atat ti.

¹⁴Maddau i mi am fod wedi tywallt gwaed, O Dduw. Ti ydy'r Duw sy'n fy achub i, a bydda i'n canu am dy faddeuant di.

¹⁵O ARGLWYDD, agor fy ngeg, i mi gael dy foli.

¹⁶Nid aberthau sy'n dy blesio di; a dydy offrwm i'w losgi ddim yn dy fodloni di.

¹⁷Yr aberthau wyt ti eisiau ydy ysbryd wedi ei ddryllio, calon wedi ei thorri, ac ysbryd sy'n edifar — Wnei di ddim diystyru peth felly, O Dduw.

¹⁸Gwna i Seion lwyddo! Helpa hi! Adeilada waliau Jerwsalem unwaith eto!

¹⁹Wedyn bydd aberthau sy'n cael eu cyflwyno'n iawn, ac offrymau cyflawn i'w llosgi, yn dy blesio di; a bydd teirw yn cael eu hoffrymu ar dy allor di.