Read Gobaith i Gymru Salm 55 Bible Online

Salm 55 - Gobaith i Gymru bible

Salm 55

¹I'r arweinydd cerdd: Mascîl i gyfeiliant offerynnau llinynnol. Salm Dafydd. [1] Gwrando ar fy ngweddi, O Dduw; paid diystyru fi'n galw am dy help!

²Gwranda arna i, ac ateb fi. Mae'r sefyllfa yma yn fy llethu; dw i wedi drysu'n lân!

³Mae'r gelyn yn gweiddi arna i, ac yn bygwth pob math o ddrwg. Dŷn nhw ond eisiau creu helynt ac ymosod arna i yn wyllt.

⁴Mae fy nghalon yn rasio tu mewn i mi. Mae ofn marw wedi mynd yn drech na mi.

⁵Mae ofn a dychryn wedi fy llethu i — dw i'n methu stopio crynu!

⁶“O na fyddai gen i adenydd fel colomen, i mi gael hedfan i ffwrdd a gorffwys!

⁷Byddwn i'n hedfan yn bell i ffwrdd, ac yn aros yn yr anialwch. Saib

⁸Byddwn i'n brysio i ffwrdd i guddio, ymhell o'r storm a'r cythrwfl i gyd.”

⁹Dinistria nhw ARGLWYDD; a drysu eu cynlluniau nhw! Dw i'n gweld dim byd ond trais a chweryla yn y ddinas.

¹⁰Mae milwyr yn cerdded ei waliau i'w hamddiffyn ddydd a nos, ond y tu mewn iddi mae'r drwg go iawn.

¹¹Pobl yn bygwth ei gilydd ym mhobman — dydy gormes a thwyll byth yn gadael ei strydoedd!

¹²Nid y gelyn sy'n fy ngwawdio i — gallwn oddef hynny; Nid y gelyn sy'n fy sarhau i — gallwn guddio oddi wrth hwnnw;

¹³Na! Ti, sy'n ddyn fel fi, yn gyfaill agos; fy ffrind i!

¹⁴Roedd dy gwmni di mor felys wrth i ni gerdded gyda'n gilydd yn nhŷ Dduw.

¹⁵Gad i'r gelynion yn sydyn gael eu taro'n farw! Gad i'r bedd eu llyncu nhw'n fyw! Does dim ond drygioni ble bynnag maen nhw!

¹⁶Ond dw i'n mynd i alw ar Dduw, a bydd yr ARGLWYDD yn fy achub i.

¹⁷Dw i'n dal ati i gwyno a phledio, fore, nos, a chanol dydd. Dw i'n gwybod y bydd e'n gwrando!

¹⁸Bydd e'n dod â fi allan yn saff o ganol yr ymladd, er bod cymaint yn fy erbyn i.

¹⁹Bydd Duw, sy'n teyrnasu o'r dechrau cyntaf, yn gwrando arna i ac yn eu trechu nhw! Saib Maen nhw'n gwrthod newid eu ffyrdd, a dangos parch tuag at Dduw.

²⁰Ond am fy ffrind wnaeth droi yn fy erbyn i, torri ei air wnaeth e.

²¹Roedd yn seboni gyda'i eiriau, ond ymosod oedd ei fwriad. Roedd ei eiriau yn dyner fel olew, ond cleddyfau noeth oedden nhw go iawn.

²²Rho dy feichiau trwm i'r ARGLWYDD; bydd e'n edrych ar dy ôl di. Wnaiff e ddim gadael i'r cyfiawn syrthio.

²³O Dduw, byddi di'n taflu'r rhai drwg i bwll dinistr — Bydd y rhai sy'n lladd ac yn twyllo yn marw'n ifanc. Ond dw i'n dy drystio di.