Read Gobaith i Gymru Salm 57 Bible Online

Salm 57 - Gobaith i Gymru bible

Salm 57

¹I'r arweinydd cerdd: Ar yr alaw "Paid dinistrio". Salm wedi ei hysgrifennu gan Dafydd pan oedd wedi ffoi rhag Saul i'r ogof. [26†] [1] Dangos drugaredd ata i, O Dduw, dangos drugaredd ata i! Dw i'n troi atat ti am loches. Dw i am guddio dan dy adenydd di nes bydd y storm yma wedi mynd heibio.

²Dw i'n galw ar Dduw, y Goruchaf; ar y Duw sydd mor dda tuag ata i.

³Bydd yn anfon help o'r nefoedd i'm hachub. Bydd yn herio y rhai sy'n fy erlid. Saib Bydd yn dangos ei ofal ffyddlon amdana i!

⁴Mae llewod ffyrnig o'm cwmpas i ym mhobman, rhai sy'n bwyta pobl — Mae eu dannedd fel picellau neu saethau, a'u tafodau fel cleddyfau miniog.

⁵Dangos dy hun yn uwch na'r nefoedd, O Dduw, i dy ysblander gael ei weld drwy'r byd i gyd!

⁶Maen nhw wedi gosod rhwyd i geisio fy nal — a minnau'n isel fy ysbryd. Maen nhw wedi cloddio twll ar fy nghyfer i, ond nhw fydd yn syrthio i mewn iddo! Saib

⁷Dw i'n benderfynol, O Dduw; dw i'n hollol benderfynol! Dw i'n mynd i ganu mawl i ti!

⁸Deffro, fy enaid! Deffro, nabl a thelyn! Dw i'n mynd i ddeffro'r wawr gyda'm cân.

⁹Dw i'n mynd i ddiolch i ti, O ARGLWYDD, o flaen pawb! Dw i'n mynd i ganu mawl i ti o flaen pobl o bob cenedl!

¹⁰Mae dy gariad di mor uchel â'r nefoedd, a dy ffyddlondeb di yn uwch na'r cymylau.

¹¹Dangos dy hun yn uwch na'r nefoedd, O Dduw, i dy ysblander gael ei weld drwy'r byd i gyd!