Read Gobaith i Gymru Salm 59 Bible Online

Salm 59 - Gobaith i Gymru bible

Salm 59

¹I'r arweinydd cerdd: Ar yr alaw "Paid dinistrio". Salm wedi ei hysgrifennu gan Dafydd pan oedd Saul wedi anfon dynion i wylio ei dŷ er mwyn ei ladd. [27†] [1] Achub fi rhag fy ngelynion, O Dduw. Amddiffyn fi rhag y rhai sy'n ymosod arna i.

²Achub fi rhag y bobl ddrwg yma — y rhai sy'n ceisio fy lladd i.

³Edrych arnyn nhw'n cuddio. Maen nhw'n barod i ymosod. Mae dynion cas yn disgwyl amdana i, a minnau heb wneud dim byd i'w croesi nhw, O ARGLWYDD.

⁴Dw i ddim ar fai ond maen nhw'n rhuthro i ymosod arna i. Deffra! Gwna rywbeth i'm helpu!

⁵O ARGLWYDD, y Duw holl-bwerus, ti ydy Duw Israel. Symud! Tyrd i gosbi'r gwledydd! Paid dangos trugaredd at y bradwyr! Saib

⁶Maen nhw'n dod allan bob nos, yn udo fel y cŵn sy'n prowla trwy'r ddinas.

⁷Mae eu cegau'n glafoerio budreddi, a'u geiriau creulon fel cleddyfau — “Pwy sy'n clywed?” medden nhw.

⁸Ond rwyt ti, ARGLWYDD, yn chwerthin ar eu pennau. Byddi di'n gwawdio'r cenhedloedd.

⁹Ti ydy fy nerth i. Dw i'n disgwyl amdanat ti. Rwyt ti, O Dduw, fel craig ddiogel i mi.

¹⁰Ti ydy'r Duw ffyddlon fydd yn fy helpu; byddi'n gadael i mi orfoleddu dros fy ngelynion.

¹¹Paid lladd nhw'n syth, neu bydd fy mhobl yn anghofio'r wers. Anfon nhw ar chwâl gyda dy nerth, cyn eu llorio nhw, O ARGLWYDD, ein tarian.

¹²Gad iddyn nhw gael eu baglu gan eu geiriau pechadurus a'r pethau drwg maen nhw'n ddweud — y balchder, y melltithion a'r celwyddau.

¹³Dinistria nhw yn dy lid! Difa nhw'n llwyr! Yna bydd pawb drwy'r byd i gyd yn gwybod fod Duw yn teyrnasu dros bobl Jacob. Saib

¹⁴Maen nhw'n dod allan bob nos, yn udo fel cŵn sy'n prowla trwy'r ddinas;

¹⁵Maen nhw'n crwydro o gwmpas yn chwilio am fwyd, ac yn udo nes iddyn nhw gael eu bodloni.

¹⁶Ond bydda i'n canu am dy rym di, ac yn gweiddi'n llawen bob bore am dy fod mor ffyddlon! Rwyt ti'n graig saff i mi, ac yn lle i mi guddio pan dw i mewn trafferthion.

¹⁷Ti ydy fy nerth i, a dw i am ganu mawl i ti! O Dduw, rwyt fel craig ddiogel i mi — y Duw ffyddlon.