Read Gobaith i Gymru Salm 6 Bible Online

Salm 6 - Gobaith i Gymru bible

Salm 6

¹I'r arweinydd cerdd: Salm i gyfeiliant offerynnau llinynnol. Ar yr wythfed. [6] Salm Dafydd. [1] O ARGLWYDD, paid bod yn ddig a'm cosbi i, paid dweud y drefn yn dy wylltineb.

²Bydd yn garedig ata i, ARGLWYDD, achos dw i mor wan. Iachâ fi, ARGLWYDD, dw i'n crynu at yr asgwrn.

³Dw i wedi dychryn am fy mywyd, ac rwyt ti, ARGLWYDD … — O, am faint mwy?

⁴ ARGLWYDD, tyrd! Achub fi! Dangos mor ffyddlon wyt ti. Gollwng fi'n rhydd!

⁵Dydy'r rhai sydd wedi marw ddim yn dy gofio di. Pwy sy'n dy foli di yn ei fedd?

⁶Dw i wedi blino tuchan. Mae fy ngwely'n wlyb gan ddagrau bob nos; mae dagrau wedi socian lle dw i'n gorwedd.

⁷Mae fy llygaid wedi mynd yn wan gan flinder, dw i wedi ymlâdd o achos fy holl elynion.

⁸Ewch i ffwrdd, chi sy'n gwneud drwg! Mae'r ARGLWYDD wedi fy nghlywed i'n crïo.

⁹Mae wedi fy nghlywed i'n pledio am help. Bydd yr ARGLWYDD yn ateb fy ngweddi.

¹⁰Bydd fy holl elynion yn cael eu siomi a'u dychryn. Byddan nhw'n troi yn ôl yn sydyn, wedi siomi.