Read Gobaith i Gymru Salm 66 Bible Online

Salm 66 - Gobaith i Gymru bible

Salm 66

¹I'r arweinydd cerdd: Cân. Salm. [1] Gwaeddwch yn uchel i Dduw, holl bobl y byd!

²Canwch gân i ddweud mor wych ydy e, a'i foli'n hyfryd.

³Dwedwch wrth Dduw, “Mae dy weithredoedd di mor syfrdanol! Am dy fod ti mor rymus mae dy elynion yn crynu o dy flaen.

⁴Mae'r byd i gyd yn dy addoli, ac yn canu mawl i ti! Maen nhw'n dy foli di ar gân!” Saib

⁵Dewch i weld beth wnaeth Duw. Mae'r hyn wna ar ran pobl yn syfrdanol.

⁶Trodd y môr yn dir sych, a dyma nhw'n cerdded drwy'r afon! Gadewch i ni ddathlu'r peth!

⁷Mae e'n dal i deyrnasu yn ei nerth, ac mae'n cadw ei lygaid ar y cenhedloedd; felly peidiwch gwrthryfela a chodi yn ei erbyn. Saib

⁸O bobloedd, bendithiwch ein Duw ni; gadewch i ni glywed pobl yn ei foli!

⁹Fe sy'n ein cadw ni'n fyw; dydy e ddim wedi gadael i'n traed lithro.

¹⁰Ti wedi ein profi ni, O Dduw, a'n puro ni fel arian mewn ffwrnais.

¹¹Ti wedi ein dal ni mewn rhwyd, a gwneud i ni ddioddef baich trwm.

¹²Ti wedi gadael i bobl farchogaeth troson ni. Dŷn ni wedi bod trwy ddŵr a thân, ond ti wedi dod â ni trwy'r cwbl i brofi digonedd.

¹³Dw i'n dod i dy deml ag offrymau llosg ac yn cadw fy addewidion,

¹⁴drwy wneud popeth wnes i addo pan oeddwn i mewn trafferthion.

¹⁵Dw i'n dod ag anifeiliaid wedi eu pesgi yn offrymau llosg — arogl hyrddod yn cael eu llosgi, teirw a bychod geifr yn cael eu haberthu. Saib

¹⁶Dewch i wrando, chi sy'n addoli Duw, i mi ddweud wrthoch chi beth wnaeth e i mi.

¹⁷Dyma fi'n gweiddi'n uchel arno am help — roeddwn i'n barod i'w foli.

¹⁸Petawn i'n euog o feddwl yn ddrwg amdano, fyddai'r ARGLWYDD ddim wedi gwrando arna i.

¹⁹Ond dyma Duw yn clywed; a gwrando ar fy ngweddi.

²⁰Mae Duw yn haeddu ei foli! Wnaeth e ddim diystyru fy ngweddi, na bod yn anffyddlon i mi.