Read Gobaith i Gymru Salm 68 Bible Online

Salm 68 - Gobaith i Gymru bible

Salm 68

¹I'r arweinydd cerdd: Salm Dafydd. Cân. [1] Pan mae Duw yn codi, mae'r gelynion yn cael eu gwasgaru; mae'r rhai sydd yn ei erbyn yn dianc oddi wrtho.

²Chwytha nhw i ffwrdd, fel mwg yn cael ei chwythu gan y gwynt! Bydd pobl ddrwg yn cael eu difa gan Dduw, fel cwyr yn cael ei doddi gan dân.

³Ond bydd y rhai cyfiawn yn dathlu, ac yn gorfoleddu o flaen Duw; byddan nhw wrth eu boddau!

⁴Canwch i Dduw! Canwch gân o fawl iddo, a chanmol yr un sy'n marchogaeth y cymylau! Yr ARGLWYDD ydy ei enw! Dewch i ddathlu o'i flaen!

⁵Tad plant amddifad, yr un sy'n amddiffyn gweddwon, ie, Duw yn ei gysegr.

⁶Mae Duw yn rhoi'r digartref mewn teulu, ac yn gollwng caethion yn rhydd i sain cerddoriaeth. Ond bydd y rhai sy'n gwrthryfela yn byw mewn anialwch.

⁷O Dduw, pan oeddet ti'n arwain dy bobl allan, ac yn martsio ar draws yr anialwch, Saib

⁸dyma'r ddaear yn crynu, a'r awyr yn arllwys y glaw o flaen Duw, yr un oedd ar Sinai, o flaen Duw, sef Duw Israel.

⁹Rhoist ddigonedd o law i'r tir, O Dduw, ac adfer dy etifeddiaeth pan oedd yn gwywo.

¹⁰Dyna ble mae dy bobl yn byw. Buost yn dda, a rhoi yn hael i'r anghenus, O Dduw.

¹¹Mae'r ARGLWYDD yn dweud y gair, ac mae tyrfa o ferched yn cyhoeddi'r newyddion da:

¹²Mae'r brenhinoedd a'u byddinoedd yn ffoi ar frys, a gwragedd tŷ yn rhannu'r ysbail.

¹³“Er dy fod wedi aros adre rhwng y corlannau, dyma i ti adenydd colomen wedi eu gorchuddio ag arian a blaenau'r adenydd yn aur melyn coeth.”

¹⁴Pan oedd y Duw Hollalluog yn gwasgaru'r brenhinoedd, roedd fel petai storm eira yn chwythu ar Fynydd Salmon!

¹⁵O fynydd anferth, mynydd Bashan [31]; O fynydd y copaon uchel, mynydd Bashan;

¹⁶O fynydd y copaon uchel, pam wyt ti mor genfigennus o'r mynydd mae Duw wedi ei ddewis i fyw arno? Dyna ble bydd yr ARGLWYDD yn aros am byth! [32†]

¹⁷Mae gan Dduw ddegau o filoedd o gerbydau, a miloedd ar filoedd o filwyr. Mae'r ARGLWYDD gyda nhw; mae Duw Sinai wedi dod i'w gysegr!

¹⁸Ti wedi mynd i fyny i'r ucheldir, ac arwain caethion ar dy ôl, a derbyn rhoddion gan bobl — hyd yn oed gan y rhai oedd yn gwrthwynebu i ti aros yno, ARGLWYDD Dduw.

¹⁹Mae'r ARGLWYDD yn Dduw bendigedig! Mae e'n edrych ar ein holau ni o ddydd i ddydd. Duw ydy'n hachubwr ni! Saib

²⁰Ein Duw ni ydy'r Duw sy'n achub! Gyda'r ARGLWYDD, ein Meistr, gallwn ddianc rhag marwolaeth.

²¹Fe ydy'r Duw sy'n taro pennau ei elynion — pob copa walltog sy'n euog o'i flaen.

²²Dwedodd yr ARGLWYDD, “Bydda i'n dod a'r gelynion yn ôl o Bashan, ie, hyd yn oed yn ôl o waelod y môr!

²³Byddi'n trochi dy draed yn eu gwaed, a bydd tafodau dy gŵn yn cael eu siâr o'r cyrff.”

²⁴Mae pobl yn gweld dy orymdaith, O Dduw, yr orymdaith pan mae fy Nuw, fy mrenin, yn mynd i'r cysegr.

²⁵Y cantorion ar y blaen, yna'r offerynnwr yng nghanol y merched ifanc sy'n taro'r tambwrîn.

²⁶“Bendithiwch Dduw yn y gynulleidfa fawr! Bendithiwch yr ARGLWYDD, bawb sy'n tarddu o ffynnon Israel.”

²⁷Dacw Benjamin, yr ifancaf, yn arwain; penaethiaid Jwda yn dyrfa swnllyd; penaethiaid Sabulon a Nafftali.

²⁸Mae dy Dduw yn dy wneud di'n gryf! O Dduw, sydd wedi gweithredu ar ein rhan, dangos dy rym

²⁹wrth ddod o dy deml yn Jerwsalem. Boed i frenhinoedd dalu teyrnged i ti!

³⁰Cerydda fwystfil y corsydd brwyn, y gyr o deirw a'r bobl sy'n eu dilyn fel lloi! Gwna iddyn nhw blygu o dy flaen a rhoi arian i ti'n rhodd. Ti'n gyrru'r bobloedd sy'n mwynhau rhyfel ar chwâl!

³¹Bydd llysgenhadon yn dod o'r Aifft, a bydd pobl Affrica [33] yn brysio i dalu teyrnged i Dduw.

³²Canwch i Dduw, chi wledydd y byd! Canwch fawl i'r ARGLWYDD. Saib

³³I'r un sy'n marchogaeth drwy'r awyr — yr awyr sydd yno o'r dechrau. Gwrandwch! Mae ei lais nerthol yn taranu.

³⁴Cyfaddefwch mor rymus ydy Duw! Mae e'n teyrnasu yn ei holl ysblander dros Israel, ac yn dangos ei rym yn yr awyr.

³⁵O Dduw, rwyt ti'n syfrdanol yn dod allan o dy gysegr! Ie, Duw Israel sy'n rhoi grym a nerth i'w bobl. Boed i Dduw gael ei anrhydeddu!