Read Gobaith i Gymru Salm 69 Bible Online

Salm 69 - Gobaith i Gymru bible

Salm 69

¹I'r arweinydd cerdd: Ar yr alaw "Lilïau". Salm Dafydd. [1] Achub fi, O Dduw, mae'r dŵr i fyny at fy ngwddf.

²Dw i'n suddo mewn cors ddofn, a does dim byd i mi sefyll arno. Dw i mewn dyfroedd dyfnion, ac yn cael fy ysgubo i ffwrdd gan y llifogydd.

³Dw i wedi blino gweiddi am help; mae fy ngwddf yn sych; mae fy llygaid yn cau ar ôl bod yn disgwyl yn obeithiol am Dduw.

⁴Mae mwy o bobl yn fy nghasáu i, nag sydd o flew ar fy mhen. Mae cymaint o bobl gelwyddog yn fy erbyn i, ac eisiau fy nistrywio i. Sut alla i roi yn ôl rywbeth dw i heb ei ddwyn?

⁵O Dduw, rwyt ti'n gwybod gymaint o ffŵl ydw i. Dydy'r pethau dw i'n euog o'u gwneud ddim wedi eu cuddio oddi wrthot ti.

⁶Paid gadael i'r rhai sy'n dy drystio di fod â chywilydd ohono i, Feistr, ARGLWYDD holl-bwerus. Paid gadael i'r rhai sy'n dy ddilyn di gael eu bychanu, O Dduw Israel.

⁷Ti ydy'r rheswm pam dw i'n cael fy sarhau, a'm cywilyddio;

⁸Dydy fy nheulu ddim eisiau fy nabod i; dw i fel rhywun estron i'm brodyr a'm chwiorydd.

⁹Mae fy sêl dros dy dŷ di wedi fy meddiannu i; dw i'n cael fy sarhau gan y rhai sy'n dy sarhau di.

¹⁰Hyd yn oed pan oeddwn i'n wylo ac ymprydio roeddwn i'n destun sbort.

¹¹Roedd pobl yn gwneud hwyl ar fy mhen pan oeddwn i'n gwisgo sachliain.

¹²Mae'r rhai sy'n eistedd wrth giât y ddinas yn siarad amdana i; a dw i'n destun cân i'r meddwon.

¹³O ARGLWYDD, dw i'n gweddïo arnat ti ac yn gofyn i ti ddangos ffafr ata i. O Dduw, am dy fod ti mor ffyddlon, ateb fi ac achub fi.

¹⁴Tynna fi allan o'r mwd yma. Paid gadael i mi suddo! Achub fi rhag y bobl sy'n fy nghasáu i — achub fi o'r dŵr dwfn.

¹⁵Paid gadael i'r llifogydd fy ysgubo i ffwrdd! Paid gadael i'r dyfnder fy llyncu. Paid gadael i geg y pwll gau arna i.

¹⁶Ateb fi, ARGLWYDD; rwyt ti mor ffyddlon. Tro ata i, gan dy fod ti mor drugarog;

¹⁷Paid troi dy gefn ar dy was — dw i mewn trafferthion, felly brysia! Ateb fi!

¹⁸Tyrd yma! Gollwng fi'n rhydd! Gad i mi ddianc o afael y gelynion.

¹⁹Ti'n gwybod fel dw i wedi cael fy sarhau, a'm bychanu a'm cywilyddio. Ti'n gweld y gelynion i gyd.

²⁰Mae'r sarhau wedi torri fy nghalon i. Dw i'n anobeithio. Dw i'n edrych am gydymdeimlad, ond yn cael dim; am rai i'm cysuro, ond does neb.

²¹Yn lle hynny maen nhw'n rhoi gwenwyn yn fy mwyd, ac yn gwneud i mi yfed finegr i dorri fy syched.

²²Gad i'w bwrdd bwyd droi'n fagl iddyn nhw, ac yn drap i'w ffrindiau nhw.

²³Gad iddyn nhw golli eu golwg a mynd yn ddall. Gwna iddyn nhw grynu mewn ofn drwy'r adeg.

²⁴Tywallt dy ddicter arnyn nhw. Gwylltia'n gynddeiriog gyda nhw.

²⁵Gwna eu gwersylloedd nhw yn anial, heb neb yn byw yn eu pebyll!

²⁶Maen nhw'n blino y rhai rwyt ti wedi eu taro, ac yn siarad am boen yr rhai rwyt ti wedi eu hanafu.

²⁷Ychwanega hyn at y pethau maen nhw'n euog o'u gwneud. Paid gadael iddyn nhw fynd yn rhydd!

²⁸Rhwbia eu henwau oddi ar sgrôl y rhai sy'n fyw, Paid rhestru nhw gyda'r bobl sy'n iawn gyda ti.

²⁹Ond fi — yr un sy'n dioddef ac mewn poen — O Dduw, achub fi a chadw fi'n saff.

³⁰Dw i'n mynd i ganu cân o fawl i Dduw; a'i ganmol a diolch iddo.

³¹Bydd hynny'n plesio'r ARGLWYDD fwy nag ychen, neu darw gyda chyrn a charnau.

³²Bydd pobl gyffredin yn gweld hyn ac yn dathlu. Felly codwch eich calonnau, chi sy'n ceisio dilyn Duw!

³³Mae'r ARGLWYDD yn gwrando ar y rhai sydd mewn angen, a dydy e ddim yn diystyru ei bobl sy'n gaeth.

³⁴Boed i'r nefoedd a'r ddaear ei foli, a'r môr hefyd, a phopeth sydd ynddo!

³⁵Oherwydd bydd Duw yn achub Seion ac yn adeiladu trefi Jwda eto. Bydd y bobl sy'n ei wasanaethu yn byw yno ac yn meddiannu'r wlad.

³⁶Bydd eu disgynyddion yn ei hetifeddu; a bydd y rhai sy'n caru ei enw yn cael byw yno.