Read Gobaith i Gymru Salm 7 Bible Online

Salm 7 - Gobaith i Gymru bible

Salm 7

¹Salm alar gan Dafydd. Canodd hi i'r ARGLWYDD am Cwsh, un o lwyth Benjamin. [1] O ARGLWYDD, fy Nuw, dw i'n troi atat ti am loches. Helpa fi i ddianc oddi wrth y rhai sy'n fy erlid. Achub fi,

²rhag iddyn nhw, fel llew, fy rhwygo'n ddarnau, ie, yn ddarnau mân, nes bod neb yn gallu fy achub.

³O ARGLWYDD, fy Nuw, os ydy e'n wir — os ydw i'n euog o wneud drwg,

⁴os ydw i wedi bradychu fy ffrind, (ie fi, yr un a achubodd fy ngelyn am ddim gwobr!)

⁵yna gad i'r gelyn ddod ar fy ôl i, a'm dal i. Gad iddo fy sathru dan draed, a'm gadael i orwedd mewn cywilydd ar lawr. Saib

⁶Côd, ARGLWYDD! Dangos dy fod ti'n ddig, a sefyll yn erbyn ymosodiadau ffyrnig y gelyn! Symud! Tyrd i ymladd ar fy rhan i, a dangos sut rwyt ti'n mynd i'w barnu nhw!

⁷Mae'r bobloedd wedi ymgasglu o dy gwmpas; eistedd di ar dy orsedd uwch eu pennau!

⁸Mae'r ARGLWYDD yn barnu'r cenhedloedd! Achub fy ngham, O ARGLWYDD, achos dw i wedi gwneud beth sy'n iawn. Dw i ddim ar fai.

⁹O Dduw cyfiawn, yr un sy'n treiddio'r meddwl a'r gydwybod, stopia'r holl ddrygioni mae pobl yn ei wneud. Ond gwna'r rhai sy'n gwneud beth sy'n iawn yn gadarn.

¹⁰Mae'r Duw mawr fel tarian i mi; mae'n achub yr un sy'n byw'n iawn.

¹¹Mae Duw yn farnwr cyfiawn, ond mae'n dangos bob dydd ei fod wedi digio

¹²wrth y rhai sydd ddim yn troi cefn ar bechod. Mae'n rhoi min ar ei gleddyf, yn plygu ei fwa ac yn anelu.

¹³Mae'n paratoi arfau marwol ac yn defnyddio saethau tanllyd i ymladd yn eu herbyn.

¹⁴Edrychwch! Mae'r dyn drwg wrthi eto! Mae'n feichiog o ddrygioni, ac yn geni dim byd ond twyll!

¹⁵Ond ar ôl cloddio twll dwfn i eraill, bydd yn syrthio i'w drap ei hun!

¹⁶Bydd y drwg mae'n ei wneud yn ei daro'n ôl; a'i drais yn ei fwrw ar ei dalcen.

¹⁷A bydda i'n moli'r ARGLWYDD am fod mor gyfiawn, ac yn canu emyn o fawl i enw'r ARGLWYDD Goruchaf.