Read Gobaith i Gymru Salm 71 Bible Online

Salm 71 - Gobaith i Gymru bible

Salm 71

¹Dw i'n troi atat ti am loches, O ARGLWYDD; paid gadael i mi gael fy siomi.

²Rwyt ti'n gyfiawn, felly achub fi a gollwng fi'n rhydd. Gwranda arna i! Achub fi!

³Bydd yn graig i mi gysgodi tani — yn gaer lle bydda i'n hollol saff! Ti ydy'r graig ddiogel yna; ti ydy'r gaer.

⁴Fy Nuw, achub fi o ddwylo'r rhai drwg, ac o afael y rhai anghyfiawn a chreulon.

⁵Achos ti ydy fy ngobaith i, fy meistr, fy ARGLWYDD. Dw i wedi dy drystio di ers pan o'n i'n ifanc.

⁶Dw i'n dibynnu arnat ti ers cyn i mi gael fy ngeni; ti wedi gofalu amdana i o groth fy mam; a ti ydy testun fy mawl bob amser.

⁷Dw i wedi bod yn destun rhyfeddod i lawer, am dy fod ti wedi bod yn lle saff, cadarn i mi.

⁸Dw i'n dy foli di drwy'r adeg, ac yn dy ganmol drwy'r dydd.

⁹Paid taflu fi ffwrdd yn fy henaint; a'm gadael wrth i'r corff wanhau!

¹⁰Mae fy ngelynion yn siarad amdana i; a'r rhai sy'n gwylio fy mywyd yn cynllwynio.

¹¹“Mae Duw wedi ei adael,” medden nhw; “Ewch ar ei ôl a'i ddal; fydd neb yn dod i'w achub!”

¹²O Dduw, paid mynd yn rhy bell! Fy Nuw, brysia i'm helpu i!

¹³Gad i'r rhai sy'n fy erbyn i gael eu cywilyddio'n llwyr. Gad i'r rhai sydd am wneud niwed i mi gael eu gwisgo mewn gwarth a chywilydd!

¹⁴Ond bydda i'n gobeithio bob amser, ac yn dal ati i dy foli di fwy a mwy.

¹⁵Bydda i'n dweud am dy gyfiawnder. Bydda i'n sôn yn ddi-baid am y ffordd rwyt ti'n achub; Mae cymaint i'w ddweud!

¹⁶Dw i'n dod i ddweud am y pethau mawr rwyt ti'n eu gwneud — fy meistr, fy ARGLWYDD — a dathlu'r ffaith dy fod mor gyfiawn — ie, ti yn unig!

¹⁷O Dduw, dw i wedi profi'r peth ers pan yn ifanc, ac wedi bod yn sôn am y pethau rhyfeddol rwyt ti'n eu gwneud hyd heddiw.

¹⁸Dw i bellach yn hen a'm gwallt yn wyn, ond paid gadael fi nawr, O Dduw. Dw i eisiau dweud wrth y genhedlaeth sydd i ddod am dy gryfder a'r pethau mawr rwyt ti'n eu gwneud.

¹⁹Mae dy gyfiawnder yn cyrraedd y nefoedd, O Dduw! Ti wedi gwneud pethau mor fawr — O Dduw, does neb tebyg i ti!

²⁰Er i ti adael i mi wynebu pob math o brofiadau chwerw, wnei di adael i mi fyw eto? Wnei di fy nghodi eto o ddyfnderoedd y ddaear?

²¹Adfer fy enw da! Cysura fi unwaith eto.

²²Yna byddaf yn dy foli gyda'r nabl, a chanmol dy ffyddlondeb, O fy Nuw! Bydda i'n canu i ti gyda'r delyn, O Un Sanctaidd Israel.

²³Bydda i'n gweiddi'n llawen, ac yn canu i ti go iawn — ie, â'm holl nerth, am i ti ngollwng i'n rhydd.

²⁴Fydda i ddim yn stopio sôn am dy gyfiawnder. Bydd y rhai oedd am wneud niwed i mi yn cael eu siomi a'u cywilyddio!