Read Gobaith i Gymru Salm 72 Bible Online

Salm 72 - Gobaith i Gymru bible

Salm 72

¹Gan Solomon. [1] O Dduw, rho'r gallu i'r brenin i farnu'n deg, a gwna i fab y brenin wneud beth sy'n iawn.

²Helpa fe i farnu'r bobl yn ddiduedd, a thrin dy bobl anghenus yn iawn.

³Boed i'r mynyddoedd gyhoeddi heddwch a'r bryniau gyfiawnder i'r bobl.

⁴Bydd e'n amddiffyn achos pobl dlawd, yn achub pawb sydd mewn angen ac yn cosbi'r rhai sy'n eu cam-drin.

⁵Bydd pobl yn dy addoli tra bydd haul yn yr awyr, a'r lleuad yn goleuo, o un genhedlaeth i'r llall.

⁶Bydd fel glaw mân yn disgyn ar dir ffrwythlon, neu gawodydd trwm yn dyfrhau y tir.

⁷Gwna i gyfiawnder lwyddo yn ei ddyddiau, ac i heddwch gynyddu tra bo'r lleuad yn yr awyr.

⁸Boed iddo deyrnasu o fôr i fôr, ac o'r Afon Ewffrates i ben draw'r byd!

⁹Gwna i lwythau'r anialwch blygu o'i flaen, ac i'w elynion lyfu'r llwch.

¹⁰Bydd brenhinoedd Tarshish [34] a'r ynysoedd yn talu trethi iddo; brenhinoedd Sheba a Seba [35] yn dod â rhoddion iddo.

¹¹Bydd y brenhinoedd i gyd yn plygu o'i flaen, a'r cenhedloedd i gyd yn ei wasanaethu.

¹²Mae'n achub y rhai sy'n galw arno mewn angen, a'r tlawd sydd heb neb i'w helpu.

¹³Mae'n gofalu am y gwan a'r anghenus, ac yn achub y tlodion.

¹⁴Mae'n eu rhyddhau nhw o afael gormes a thrais; mae eu bywyd nhw'n werthfawr yn ei olwg.

¹⁵Hir oes iddo! Boed iddo dderbyn aur o Sheba; Boed i bobl weddïo drosto'n ddi-baid a dymuno bendith Duw arno bob amser.

¹⁶Boed digonedd o ŷd yn y wlad — yn tyfu hyd at ben y mynyddoedd! Boed i'r cnydau lwyddo fel coed Libanus! Boed i bobl y trefi ffynnu fel glaswellt!

¹⁷Boed iddo fod yn enwog am byth; a boed i'w linach aros tra bod haul yn yr awyr! Boed i bobl gael eu bendithio trwyddo, ac i genhedloedd weld mor hapus ydy e.

¹⁸Bendith ar yr ARGLWYDD Dduw! Duw Israel, yr unig un sy'n gwneud pethau rhyfeddol!

¹⁹Bendigedig fyddo'i enw gwych am byth! Boed i'w ysblander lenwi'r byd i gyd! Ie! Amen ac Amen.

²⁰Dyma ddiwedd y casgliad yma o weddïau Dafydd fab Jesse.