Read Gobaith i Gymru Salm 73 Bible Online

Salm 73 - Gobaith i Gymru bible

Salm 73

¹Salm gan Asaff. [1] Ydy wir, mae Duw mor dda i Israel; i'r rhai sydd â chalon lân.

²Ond bu bron i mi faglu; roeddwn i bron iawn a llithro.

³Ro'n i'n genfigennus o'r rhai balch, wrth weld pobl ddrwg yn llwyddo.

⁴Does dim byd yn eu rhwymo nhw; maen nhw'n iach yn gorfforol;

⁵ddim yn cael eu hunain i helyntion fel pobl eraill; a ddim yn dioddef fel y gweddill ohonon ni.

⁶Maen nhw'n gwisgo balchder fel cadwyn aur am eu gwddf, a chreulondeb ydy'r wisg amdanyn nhw.

⁷Maen nhw'n llond eu croen, ac mor llawn ohonyn nhw eu hunain hefyd!

⁸Maen nhw'n gwawdio ac yn siarad yn faleisus, ac mor hunanhyderus wrth fygwth gormesu.

⁹Maen nhw'n siarad fel petai piau nhw'r nefoedd, ac yn strytian yn falch wrth drin y ddaear.

¹⁰Ac mae pobl Dduw yn dilyn eu hesiampl, ac yn llyncu eu llwyddiant fel dŵr. [36]

¹¹“Na, fydd Duw ddim yn gwybod!” medden nhw. “Ydy'r Goruchaf yn gwybod unrhyw beth?”

¹²Edrychwch! Dyna sut rai ydy pobl ddrwg! Yn malio dim, ac yn casglu cyfoeth.

¹³Mae'n rhaid fy mod i wedi cadw fy nghalon yn lân i ddim byd! Wedi bod mor ddiniwed wrth olchi fy nwylo!

¹⁴Dw i wedi cael fy mhlagio'n ddi-baid, ac wedi dioddef rhyw gosb newydd bob bore.

¹⁵Petawn i wedi siarad yn agored fel hyn byddwn i wedi bradychu dy bobl di.

¹⁶Roeddwn i'n ceisio deall y peth, a doedd e'n gwneud dim sens,

¹⁷nes i mi fynd i mewn i deml Dduw a sylweddoli beth oedd tynged y rhai drwg!

¹⁸Byddi'n eu gosod nhw mewn lleoedd llithrig; ac yn gwneud iddyn nhw syrthio i ddinistr.

¹⁹Byddan nhw'n cael eu dinistrio mewn chwinciad! Byddan nhw'n cael eu hysgubo i ffwrdd gan ofn.

²⁰Fel breuddwyd ar ôl i rywun ddeffro, byddi di'n deffro, O ARGLWYDD, a fyddan nhw'n ddim byd ond atgof.

²¹Dw i wedi bod yn chwerw fel finegr, a gadael i'r cwbl gorddi tu mewn i mi.

²²Dw i wedi bod mor dwp ac afresymol. Dw i wedi ymddwyn fel anifail gwyllt o dy flaen di.

²³Ac eto, dw i'n dal gyda ti; rwyt ti'n gafael yn dynn ynof fi.

²⁴Ti sy'n dangos y ffordd ymlaen i mi, a byddi'n fy nerbyn ac yn fy anrhydeddu.

²⁵Pwy sydd gen i yn y nefoedd ond ti? A does gen i eisiau neb ond ti ar y ddaear chwaith.

²⁶Mae'r corff a'r meddwl yn pallu, ond mae Duw'n graig ddiogel i mi bob amser.

²⁷Bydd y rhai sy'n bell oddi wrthot ti yn cael eu difa; byddi'n dinistrio pawb sy'n anffyddlon i ti.

²⁸Ond dw i'n gwybod mai cadw'n agos at Dduw sydd orau. Mae fy Meistr, yr ARGLWYDD, yn fy nghadw'n saff. Dw i'n mynd i ddweud wrth bawb am beth rwyt ti wedi ei wneud!