Read Gobaith i Gymru Salm 74 Bible Online

Salm 74 - Gobaith i Gymru bible

Salm 74

¹Mascîl gan Asaff. [1] O Dduw, pam wyt ti'n ddig gyda ni drwy'r amser? Pam mae dy ffroenau'n mygu yn erbyn defaid dy borfa?

²Cofia'r criw o bobl gymeraist ti i ti dy hun mor bell yn ôl; y bobl ollyngaist yn rhydd i fod yn llwyth sbesial i ti! Dyma Fynydd Seion ble rwyt ti'n byw!

³Brysia! Edrych ar yr adfeilion diddiwedd yma, a'r holl niwed mae'r gelyn wedi ei wneud i dy deml!

⁴Mae'r gelyn wedi rhuo wrth ddathlu eu concwest yn dy gysegr; a gosod eu harwyddion a'u symbolau eu hunain yno.

⁵Roedden nhw fel dynion yn chwifio bwyeill wrth glirio drysni a choed;

⁶yn dryllio'r holl waith cerfio cywrain gyda bwyeill a morthwylion.

⁷Yna rhoi dy gysegr ar dân; a dinistrio'n llwyr y deml lle roeddet ti'n aros.

⁸“Gadewch i ni ddinistrio'r cwbl!” medden nhw. A dyma nhw'n llosgi pob cysegr i Dduw yn y tir.

⁹Does dim arwydd o obaith i'w weld! Does dim proffwyd ar ôl; neb sy'n gwybod am faint mae hyn yn mynd i bara.

¹⁰O Dduw, am faint mwy mae'r gelyn yn mynd i wawdio? Ydy e'n mynd i gael sarhau dy enw di am byth?

¹¹Pam wyt ti ddim yn gwneud rhywbeth? Pam wyt ti'n dal yn ôl? Plîs gwna rywbeth!

¹²O Dduw, ti ydy fy Mrenin i o'r dechrau! Ti ydy'r Duw sy'n gweithredu ac yn achub ar y ddaear!

¹³Ti, yn dy nerth, wnaeth hollti'r môr. [37†] Ti ddrylliodd bennau y ddraig yn y dŵr.

¹⁴Ti sathrodd bennau Lefiathan, [38] a'i adael yn fwyd i greaduriaid yr anialwch.

¹⁵Ti agorodd y ffynhonnau a'r nentydd, a sychu llif yr afonydd.

¹⁶Ti sy'n rheoli'r dydd a'r nos; ti osododd y lleuad a'r haul yn eu lle.

¹⁷Ti roddodd dymhorau i'r ddaear; haf a gaeaf — ti drefnodd y cwbl!

¹⁸Cofia fel mae'r gelyn wedi dy wawdio di, ARGLWYDD; fel mae pobl ffôl wedi dy sarhau di.

¹⁹Paid rhoi dy golomen i'r bwystfil! Paid anghofio dy bobl druan yn llwyr.

²⁰Cofia'r ymrwymiad wnest ti! Mae lleoedd tywyll sy'n guddfan i greulondeb ym mhobman.

²¹Paid gadael i'r bobl sy'n dioddef droi'n ôl yn siomedig. Gad i'r tlawd a'r anghenus foli dy enw.

²²Cod, O Dduw, a dadlau dy achos! Cofia fod ffyliaid yn dy wawdio drwy'r adeg.

²³Paid diystyru twrw'r gelynion, a bloeddio diddiwedd y rhai sy'n dy wrthwynebu di.