Read Gobaith i Gymru Salm 75 Bible Online

Salm 75 - Gobaith i Gymru bible

Salm 75

¹I'r arweinydd cerdd: Ar yr alaw "Paid dinistrio". Salm gan Asaff; Cân. [1] Dŷn ni'n diolch i ti, O Dduw; ie, diolch i ti! Rwyt ti wrth law bob amser, ac mae pobl yn sôn am y pethau rhyfeddol rwyt ti'n eu gwneud.

²Meddai Duw, “Mae amser wedi ei drefnu pan fydda i'n barnu'n deg.

³Pan mae'r ddaear a phawb sy'n byw arni yn crynu, fi sy'n cadw ei cholofnau'n gadarn. Saib

⁴Dw i'n dweud wrth y balch, ‘Peidiwch brolio!’ ac wrth y rhai drwg, ‘Peidiwch bod yn rhy siŵr ohonoch eich hunain!

⁵Peidiwch codi eich cyrn yn uchel a bod mor heriol wrth siarad.’”

⁶Nid o'r gorllewin na'r dwyrain, nac o'r anialwch y daw buddugoliaeth —

⁷Duw ydy'r un sy'n barnu; fe sy'n tynnu un i lawr ac yn codi un arall.

⁸Oes, mae cwpan yn llaw'r ARGLWYDD ac mae'r gwin ynddi yn ewynnu ac wedi ei gymysgu. Bydd yn ei dywallt allan, a bydd y rhai drwg ar y ddaear yn ei yfed — yn yfed pob diferyn!

⁹Ond bydda i'n ei glodfori am byth, ac yn canu mawl i Dduw Jacob, sy'n dweud,

¹⁰“Bydda i'n torri cyrn y rhai drwg, ac yn rhoi'r fuddugoliaeth i'r rhai sy'n gwneud beth sy'n iawn.”