Read Gobaith i Gymru Salm 81 Bible Online

Salm 81 - Gobaith i Gymru bible

Salm 81

¹I'r arweinydd cerdd: Salm Asaff, ar yr alaw, "Y Gwinwryf". [1] Canwch yn llawen i Dduw, ein nerth! Gwaeddwch yn uchel ar Dduw Jacob!

²Canwch gân, taro'r drwm, a chanu'r delyn fwyn a'r nabl!

³Seiniwch y corn hwrdd [45] ar y lleuad newydd, ar ddechrau'r Ŵyl pan mae'r lleuad yn llawn.

⁴Dyma'r drefn yn Israel; gorchymyn wedi ei roi gan Dduw Jacob.

⁵Rhoddodd hi'n rheol i bobl Joseff pan ymosododd ar yr Aifft i'w gollwng yn rhydd. Dw i'n clywed iaith dw i ddim yn ei deall —

⁶“Cymerais y baich oddi ar dy ysgwyddau, a dy ollwng yn rhydd o orfod cario'r fasged.

⁷Dyma ti'n gweiddi yn dy argyfwng, a dyma fi'n dy achub; atebais di o'r lle dirgel ble mae'r taranau. Yna dy roi ar brawf wrth Ffynnon Meriba. [46†] Saib

⁸Gwrandwch, fy mhobl, dw i'n eich rhybuddio chi! O na fyddet ti'n gwrando arna i, Israel!

⁹Dwyt ti ddim i gael duw arall na phlygu i lawr i addoli duw estron.

¹⁰Fi, yr ARGLWYDD ydy dy Dduw di. Fi ddaeth â ti allan o wlad yr Aifft. Agor dy geg, a bydda i'n dy fwydo!

¹¹Ond wnaeth fy mhobl ddim gwrando. Wnaeth Israel ddim ufuddhau i mi;

¹²felly dyma fi'n gadael iddyn nhw fod yn ystyfnig a gwneud beth bynnag roedden nhw eisiau.

¹³O na fyddai fy mhobl yn gwrando arna i! O na fyddai Israel yn fy nilyn i!

¹⁴Byddwn i'n trechu eu gelynion nhw yn syth; ac yn ymosod ar y rhai sy'n eu gwrthwynebu nhw.”

¹⁵(Boed i'r rhai sy'n casáu'r ARGLWYDD wingo o'i flaen — dyna eu tynged nhw am byth!)

¹⁶“Byddwn i'n bwydo Israel â'r ŷd gorau; ac yn dy fodloni gyda mêl o'r graig.”