Read Gobaith i Gymru Salm 83 Bible Online

Salm 83 - Gobaith i Gymru bible

Salm 83

¹Cân. Salm gan Asaff. [1] O Dduw, paid bod yn ddistaw! Paid diystyru ni a gwneud dim!

²Edrych! Mae dy elynion di'n codi twrw. Mae'r rhai sy'n dy gasáu di yn codi eu pennau.

³Maen nhw mor gyfrwys, ac yn cynllwynio yn erbyn dy bobl di. Maen nhw am wneud niwed i'r rhai rwyt ti'n eu trysori!

⁴Maen nhw'n dweud, “Gadewch i ni eu difa nhw'n llwyr! Fydd dim sôn am genedl Israel byth mwy.”

⁵Maen nhw'n unfrydol yn eu bwriad, ac wedi ffurfio cynghrair yn dy erbyn di —

⁶pobl Edom a'r Ismaeliaid, Moab a'r Hagriaid,

⁷Gebal, Ammon, ac Amalec, Philistia a phobl Tyrus.

⁸Mae Asyria wedi ymuno â nhw hefyd, i roi help llaw i ddisgynyddion Lot. [47] Saib

⁹Delia gyda nhw fel y gwnest ti gyda Midian [48†] — fel y gwnest ti i Sisera a Jabin, wrth afon Cison. [49†]

¹⁰Cawson nhw eu dinistrio yn En-dor. Roedd eu cyrff fel tail ar wyneb y tir!

¹¹Delia gyda'i harweinwyr nhw fel y gwnest ti gydag Oreb a Seeb. [50†] Gwna eu tywysogion nhw fel Seba a Tsalmwna, [51†]

¹²oedd am ddwyn y tir i gyd oddi ar Dduw.

¹³O fy Nuw, trin nhw fel plu ysgall, neu us yn cael ei chwythu gan y gwynt!

¹⁴Difa nhw, fel mae tân yn llosgi coedwig, a'i fflamau'n lledu dros y bryniau.

¹⁵Dos ar eu hôl nhw â'th storm, a'u dychryn nhw â'th gorwynt.

¹⁶Coda gywilydd arnyn nhw, a gwna iddyn nhw dy gydnabod di, O ARGLWYDD.

¹⁷Cywilydd a dychryn fydd byth yn dod i ben! Gad iddyn nhw farw yn eu gwarth!

¹⁸Byddan nhw'n deall wedyn mai ti ydy'r ARGLWYDD, ie, ti yn unig! Ti ydy'r Duw Goruchaf sy'n rheoli'r byd i gyd!