Read Gobaith i Gymru Salm 84 Bible Online

Salm 84 - Gobaith i Gymru bible

Salm 84

¹I'r arweinydd cerdd: Salm meibion Cora, ar yr alaw, “Y Gwinwryf”. [1] Mae lle rwyt ti'n byw mor hyfryd, O ARGLWYDD holl-bwerus!

²Dw i'n hiraethu; ydw, dw i'n ysu am gael mynd i deml yr ARGLWYDD. Mae'r cyfan ohono i yn gweiddi'n llawen ar y Duw byw!

³Mae hyd yn oed aderyn y to wedi gwneud ei gartre yno! Mae'r wennol wedi gwneud nyth iddi ei hun, i fagu ei chywion wrth ymyl dy allor di, O ARGLWYDD holl-bwerus, fy Mrenin a'm Duw.

⁴Y fath fendith sydd i'r rhai sy'n aros yn dy dŷ di! Y rhai sy'n dy addoli di drwy'r adeg! Saib

⁵Y fath fendith sydd i'r rhai wyt ti'n eu cadw nhw'n saff, wrth iddyn nhw deithio'n frwd ar bererindod i dy deml!

⁶Wrth iddyn nhw basio trwy ddyffryn Bacha, byddi di wedi ei throi yn llawn ffynhonnau! Bydd y glaw cynnar [52] wedi tywallt ei fendithion arni.

⁷Byddan nhw'n symud ymlaen o nerth i nerth, a byddan nhw i gyd yn ymddangos o flaen Duw yn Seion.

⁸O ARGLWYDD Dduw holl-bwerus, gwrando ar fy ngweddi! Clyw fi, O Dduw Jacob. Saib

⁹Edrych ar y brenin, ein tarian ni, O Dduw! Edrych yn ffafriol ar yr un wnest ti ei eneinio.

¹⁰Mae un diwrnod yn dy deml yn well na miloedd rhywle arall! Byddai'n well gen i aros ar drothwy tŷ fy Nuw na mynd i loetran yng nghartrefi pobl ddrwg.

¹¹Mae'r ARGLWYDD Dduw yn haul ac yn darian i'n hamddiffyn ni! Mae'r ARGLWYDD yn garedig ac yn rhannu ei ysblander gyda ni. Mae e'n rhoi popeth da i'r rhai sy'n byw yn onest.

¹²O ARGLWYDD holl-bwerus, y fath fendith sydd i rywun sy'n dy drystio di!