Read Gobaith i Gymru Salm 86 Bible Online

Salm 86 - Gobaith i Gymru bible

Salm 86

¹Gweddi. Salm Dafydd. [1] Gwranda, O ARGLWYDD, ac ateb fi! Dw i'n wan ac yn ddiamddiffyn.

²Cadw fi'n saff. Dw i'n ffyddlon i ti! Achub dy was. Ti ydy fy Nuw a dw i'n dy drystio di.

³Dangos drugaredd ata i, O ARGLWYDD! Dw i wedi bod yn gweiddi arnat ti'n ddi-baid.

⁴Gwna dy was yn llawen eto! Dw i'n gweddïo'n daer arnat ti ARGLWYDD.

⁵Rwyt ti, ARGLWYDD, yn dda ac yn maddau. Rwyt ti mor anhygoel o hael at y rhai sy'n galw arnat ti!

⁶Gwranda ar fy ngweddi, O ARGLWYDD! Edrych! Dw i'n erfyn am drugaredd!

⁷Dw i mewn trafferthion ac yn galw arnat, am mai ti sy'n gallu fy ateb i.

⁸Does dim un o'r duwiau eraill yn debyg i ti, ARGLWYDD! Does neb arall yn gallu gwneud y pethau rwyt ti'n eu gwneud.

⁹Bydd yr holl genhedloedd rwyt ti wedi eu creu yn dod ac yn plygu o dy flaen di, O ARGLWYDD! Byddan nhw'n anrhydeddu dy enw di,

¹⁰am dy fod ti'n Dduw mawr ac yn gwneud pethau anhygoel! Ti ydy'r unig Dduw go iawn!

¹¹Dysga fi sut i fyw, O ARGLWYDD, i mi dy ddilyn di'n ffyddlon. Gwna fi'n benderfynol o d'addoli di'n iawn.

¹²Bydda i'n dy addoli o waelod calon, O ARGLWYDD fy Nuw, ac yn anrhydeddu dy enw am byth.

¹³Mae dy gariad tuag ata i mor fawr! Ti wedi fy achub i o ddyfnder Annwn. [53]

¹⁴O Dduw, mae yna bobl haerllug wedi troi yn fy erbyn i. Mae yna griw creulon am fy lladd i, Does dim bwys ganddyn nhw amdanat ti.

¹⁵Ond rwyt ti, O ARGLWYDD, mor drugarog a charedig, rwyt mor amyneddgar! Mae dy haelioni a dy ffyddlondeb di yn anhygoel! [54†]

¹⁶Tro ata i, a dangos drugaredd! Rho dy nerth i dy was, Achub blentyn dy gaethferch!

¹⁷Dangos i mi ryw arwydd o dy ddaioni, er mwyn i'r rhai sy'n fy nghasáu i weld hynny a chael eu cywilyddio am dy fod ti, ARGLWYDD, wedi fy helpu i a'm cysuro.