Read Gobaith i Gymru Salm 89 Bible Online

Salm 89 - Gobaith i Gymru bible

Salm 89

¹Mascîl gan Ethan yr Esrachiad. [57†] [1] Dw i'n mynd i ganu am byth am gariad yr ARGLWYDD; dweud am dy ffyddlondeb wrth un genhedlaeth ar ôl y llall.

²Cyhoeddi fod dy haelioni yn ddiddiwedd; dy ffyddlondeb mor sicr â'r nefoedd.

³Dwedaist, “Dw i wedi gwneud ymrwymiad i'r un dw i wedi ei ddewis, ac wedi tyngu llw wrth Dafydd fy ngwas:

⁴‘Bydda i'n gwneud dy ddisgynyddion yn sefydlog am byth ac yn cynnal dy orsedd ar hyd y cenedlaethau.’” Saib

⁵Mae'r pethau rhyfeddol rwyt ti'n eu gwneud yn cael eu canmol yn y nefoedd, O ARGLWYDD, a dy ffyddlondeb hefyd gan yr angylion sanctaidd!

⁶Pwy sy'n debyg i'r ARGLWYDD yn y cymylau uchod? Pa un o'r bodau nefol sy'n debyg i'r ARGLWYDD?

⁷Duw ydy'r un sy'n codi braw ar yr angylion sanctaidd; mae e mor syfrdanol i'r rhai sydd o'i gwmpas.

⁸O ARGLWYDD Dduw holl-bwerus, Oes rhywun mor gryf â ti, ARGLWYDD? Mae ffyddlondeb yn dy amgylchynu!

⁹Ti sy'n rheoli'r môr mawr: pan mae ei donnau'n codi, rwyt ti'n eu tawelu.

¹⁰Ti sathrodd yr anghenfil Rahab; roedd fel corff marw! Ti chwalodd dy elynion gyda dy fraich gref.

¹¹Ti sydd piau'r nefoedd, a'r ddaear hefyd; ti wnaeth y byd a phopeth sydd ynddo.

¹²Ti greodd y gogledd a'r de; mae mynyddoedd Tabor a Hermon yn canu'n llawen i ti.

¹³Mae dy fraich di mor bwerus, ac mae dy law di mor gref. Mae dy law dde wedi ei chodi'n fuddugoliaethus.

¹⁴Tegwch a chyfiawnder ydy sylfaen dy orsedd. Cariad ffyddlon a gwirionedd sy'n dy nodweddu di.

¹⁵Mae'r rhai sy'n dy addoli di'n frwd wedi eu bendithio'n fawr! O ARGLWYDD, nhw sy'n profi dy ffafr di.

¹⁶Maen nhw'n llawenhau ynot ti drwy'r dydd; ac yn cael eu cynnal gan dy gyfiawnder.

¹⁷Ti sy'n rhoi nerth ac ysblander iddyn nhw. Dy ffafr di sy'n rhoi'r fuddugoliaeth i ni!

¹⁸Ti, ARGLWYDD, ydy'n tarian. Ti ydy'n brenin ni, Un Sanctaidd Israel.

¹⁹Un tro, dyma ti'n siarad gyda dy ddilynwyr ffyddlon mewn gweledigaeth. “Dw i wedi rhoi nerth i ryfelwr,” meddet ti; “dw i wedi codi bachgen ifanc o blith y bobl.

²⁰Dw i wedi dod o hyd i Dafydd, fy ngwas; a'i eneinio'n frenin gyda'r olew sanctaidd.

²¹Bydda i yn ei gynnal e, ac yn rhoi nerth iddo.

²²Fydd dim un o'i elynion yn ei gael i dalu teyrnged, a fydd dim un gormeswr yn ei ddarostwng.

²³Bydda i'n sathru ei elynion o'i flaen; ac yn taro i lawr y rhai sy'n ei gasáu.

²⁴Bydd e'n cael profi fy ffyddlondeb a'm cariad; a bydda i'n ei anfon i ennill buddugoliaeth.

²⁵Bydda i'n gosod ei law chwith dros y môr, a'i law dde ar afonydd Ewffrates.

²⁶Bydd e'n dweud wrtho i, ‘Ti ydy fy Nhad i, fy Nuw, a'r graig sy'n fy achub i.’

²⁷Bydda i'n ei wneud e yn fab hynaf i mi, yn uwch na holl frenhinoedd y byd.

²⁸Bydda i'n aros yn ffyddlon iddo am byth; mae fy ymrwymiad iddo yn hollol ddiogel.

²⁹Bydd ei ddisgynyddion yn ei olynu am byth, a'i orsedd yn para mor hir â'r nefoedd.

³⁰Os bydd ei feibion yn troi cefn ar fy nysgeidiaeth ac yn gwrthod gwneud beth dw i'n ddweud;

³¹os byddan nhw'n torri fy rheolau i, a ddim yn cadw fy ngorchmynion i,

³²bydda i'n eu cosbi nhw gyda gwialen am eu gwrthryfel; gyda plâu am iddyn nhw fynd ar gyfeiliorn.

³³Ond fydda i ddim yn stopio ei garu e, a fydda i ddim yn anffyddlon iddo.

³⁴Fydda i ddim yn torri'r ymrwymiad wnes i; bydda i'n gwneud beth wnes i addo iddo.

³⁵Dw i, y Duw sanctaidd, wedi tyngu llw, na fydda i byth yn twyllo Dafydd.

³⁶Bydd ei linach yn aros am byth, a'i orsedd yn para tra mae haul o'm blaen i.

³⁷Mae wedi ei sefydlu am byth, fel mae'r lleuad yn dyst ffyddlon i mi yn yr awyr.” Saib

³⁸Ond rwyt wedi ei wrthod, a'i wthio i'r naill ochr! Rwyt wedi gwylltio gyda'r brenin, dy eneiniog.

³⁹Rwyt wedi dileu'r ymrwymiad i dy was; ac wedi llusgo ei goron drwy'r baw.

⁴⁰Rwyt wedi bwrw ei waliau i lawr, a gwneud ei gaerau yn adfeilion.

⁴¹Mae pawb sy'n pasio heibio yn dwyn oddi arno. Mae e'n destun sbort i'w gymdogion!

⁴²Ti wedi gadael i'r rhai sy'n ei gasáu ei goncro, a rhoi achos i'w elynion i gyd ddathlu.

⁴³Rwyt wedi troi min ei gleddyf arno fe'i hun, a heb ei helpu yn y frwydr.

⁴⁴Rwyt wedi dod â'i deyrnasiad gwych i ben, ac wedi bwrw ei orsedd i lawr.

⁴⁵Rwyt wedi ei droi'n hen ddyn cyn pryd; ac wedi ei orchuddio â chywilydd. Saib

⁴⁶Am faint mwy, O ARGLWYDD? Wyt ti wedi troi dy gefn arnon ni am byth? Fydd dy lid di'n llosgi fel tân am byth?

⁴⁷Cofia mor fyr ydy fy mywyd! Wyt ti wedi creu'r ddynoliaeth i ddim byd?

⁴⁸Does neb byw yn gallu osgoi marw. Pwy sy'n gallu achub ei hun o afael y bedd? Saib

⁴⁹O ARGLWYDD, ble mae'r cariad hwnnw wnest ti ei addo'n bendant i Dafydd?

⁵⁰Cofia, ARGLWYDD, sut mae dy weision wedi eu cam-drin; a'r baich dw i wedi ei gario wrth i baganiaid wneud hwyl ar ein pennau.

⁵¹Cofia sut mae dy elynion wedi'n cam-drin ni, O ARGLWYDD, ac wedi cam-drin dy eneiniog ble bynnag mae'n mynd.

⁵²Bendith ar yr ARGLWYDD am byth! Amen ac Amen.