Read Gobaith i Gymru Salm 9 Bible Online

Salm 9 - Gobaith i Gymru bible

Salm 9

¹I'r arweinydd cerdd: Salm i leisiau merched. Salm Dafydd. [1] Addolaf di, ARGLWYDD, o waelod calon; a sôn am yr holl bethau rhyfeddol wnest ti.

²Byddaf yn llawen, a gorfoleddaf ynot. Canaf emyn o fawl i dy enw, y Goruchaf.

³Pan mae fy ngelynion yn ceisio dianc, maen nhw'n baglu ac yn cael eu dinistrio o dy flaen di,

⁴am dy fod ti'n camu i mewn a gweithredu ar fy rhan i. Ti'n eistedd ar yr orsedd ac yn dyfarnu'n gyfiawn.

⁵Ti sy'n ceryddu'r cenhedloedd, yn dinistrio'r rhai drwg, ac yn cael gwared â nhw am byth bythoedd!

⁶Mae hi ar ben ar y gelyn! Mae eu trefi'n adfeilion, a fydd neb yn cofio ble roedden nhw.

⁷Ond mae'r ARGLWYDD yn teyrnasu am byth! Mae ar ei orsedd, yn barod i farnu.

⁸Bydd yn barnu'n deg, ac yn llywodraethu'r gwledydd yn gyfiawn.

⁹Mae'r ARGLWYDD yn hafan ddiogel i'r rhai sy'n cael eu gorthrymu — yn hafan pan maen nhw mewn trafferthion.

¹⁰Mae'r rhai sy'n dy nabod di yn dy drystio di. Dwyt ti ddim yn troi cefn ar y rhai sy'n dy geisio di, O ARGLWYDD.

¹¹Canwch fawl i'r ARGLWYDD sy'n teyrnasu yn Seion! Dwedwch wrth bawb beth mae wedi ei wneud!

¹²Dydy e ddim yn diystyru cri y rhai sy'n dioddef; mae'r un sy'n dial ar y llofruddion yn gofalu amdanyn nhw.

¹³Dangos drugaredd ata i, O ARGLWYDD; edrych fel mae'r rhai sy'n fy nghasáu yn gwneud i mi ddioddef. Dim ond ti all fy nghadw rhag mynd trwy giatiau marwolaeth.

¹⁴Wedyn bydda i'n dy foli di o fewn i giatiau Seion hardd. Bydda i'n dathlu am dy fod wedi fy achub i!

¹⁵Mae'r cenhedloedd wedi llithro i'r twll wnaethon nhw ei gloddio; a'u traed wedi mynd yn sownd yn y rhwyd wnaethon nhw ei chuddio.

¹⁶Mae'r ARGLWYDD wedi dangos sut un ydy e! Mae e'n gwneud beth sy'n iawn. Mae'r rhai drwg wedi eu dal gan eu dyfais eu hunain. (Yn ddwys:) Saib

¹⁷Bydd y rhai drwg yn mynd i fyd y meirw. Dyna dynged y cenhedloedd sy'n diystyru Duw!

¹⁸Ond fydd y rhai mewn angen ddim yn cael eu hanghofio am byth; fydd gobaith ddim yn diflannu i'r rhai sy'n cael eu cam-drin.

¹⁹Cod, O ARGLWYDD! Paid gadael i ddynion meidrol gael eu ffordd! Boed i'r cenhedloedd gael eu barnu gen ti!

²⁰Dychryn nhw, O ARGLWYDD! gad iddyn nhw wybod mai dim ond dynol ydyn nhw! Saib