Read Gobaith i Gymru Salm 90 Bible Online

Salm 90 - Gobaith i Gymru bible

Salm 90

¹Gweddi Moses, dyn Duw. [1] Fy Meistr, rwyt ti wedi bod yn lle saff i ni guddio ar hyd y cenedlaethau.

²Cyn i'r mynyddoedd gael eu geni, a chyn bod y ddaear a'r byd yn bodoli, roeddet ti yn Dduw, o dragwyddoldeb pell.

³Ti sy'n anfon pobl yn ôl i'r pridd drwy ddweud, “Ewch yn ôl, chi bobl feidrol!”

⁴Mae mil o flynyddoedd yn dy olwg di fel diwrnod sydd wedi pasio heibio, neu fel gwylfa nos.

⁵Ond mae pobl yn cael eu llethu gan gwsg, ac yna fel glaswellt yn adfywio yn y bore.

⁶Mae'n tyfu ac yn llawn bywyd yn y bore, ond erbyn iddi nosi mae wedi gwywo a sychu.

⁷Dyna sut dŷn ni'n gwywo pan rwyt ti'n gwylltio; mae dy lid yn ein dychryn ni am ein bywydau.

⁸Ti'n gwybod am ein methiant ni i gyd, ac yn gweld ein pechodau cudd ni.

⁹Mae'n bywydau ni'n mynd heibio dan dy ddig; mae'n blynyddoedd ni'n darfod fel ochenaid.

¹⁰Dŷn ni'n byw am saith deg o flynyddoedd, wyth deg os cawn ni iechyd; ond mae'r gorau ohonyn nhw'n llawn trafferthion! Maen nhw'n mynd heibio mor sydyn! A dyna ni wedi mynd!

¹¹Does neb eto wedi profi holl rym dy lid. Mae dy ddig yn hawlio parch!

¹²Felly dysga ni i wneud y gorau o'n dyddiau, a gwna ni'n ddoeth.

¹³Tro yn ôl aton ni, ARGLWYDD! — Faint mwy mae'n rhaid i ni ddisgwyl? Dangos drugaredd at dy weision.

¹⁴Gad i ni brofi dy gariad ffyddlon yn y bore, yn gwneud i ni ganu'n llawen bob dydd!

¹⁵Gad i ni brofi hapusrwydd am yr un cyfnod ag rwyt ti wedi'n cosbi ni — sef y blynyddoedd hynny pan mae popeth wedi mynd o'i le.

¹⁶Gad i dy weision dy weld ti'n gwneud pethau mawr eto! Gad i'n plant ni weld mor wych wyt ti!

¹⁷Boed i'r Meistr, ein Duw ni, fod yn garedig aton ni. Gwna i'n hymdrechion ni lwyddo. Ie, gwna i'n hymdrechion ni lwyddo!