Read Gobaith i Gymru Salm 91 Bible Online

Salm 91 - Gobaith i Gymru bible

Salm 91

¹Bydd y sawl mae'r Duw Goruchaf yn ei amddiffyn yn aros yn saff dan gysgod yr Hollalluog.

²Dywedais, “ARGLWYDD, rwyt ti'n gaer ddiogel, yn lle hollol saff i mi fynd. Ti ydy fy Nuw i, yr un dw i'n ei drystio.”

³Bydd Duw yn dy achub di o drap yr heliwr, a rhag y pla marwol.

⁴Bydd e'n rhoi ei adain drosot ti, a byddi'n saff o dan blu ei adenydd. Mae'r ffaith fod Duw yn dweud y gwir yn darian sy'n dy amddiffyn di.

⁵Paid bod ag ofn dim sy'n dy ddychryn yn y nos, na'r saeth sy'n hedfan yn y dydd;

⁶yr haint sy'n llechu yn y tywyllwch, na'r dinistr sy'n taro'n sydyn ganol dydd.

⁷Gall mil o ddynion syrthio ar dy law chwith, a deg mil ar y dde, ond fyddi di ddim yn cael dy gyffwrdd.

⁸Byddi'n cael gweld drosot ti dy hun — byddi'n gweld y rhai drwg yn cael eu cosbi.

⁹Wyt, rwyt ti'n lle saff i mi guddio. ARGLWYDD! Gad i'r Duw Goruchaf fod yn hafan ddiogel i ti,

¹⁰a fyddi di ddim yn cael unrhyw niwed. Fydd dim haint yn dod yn agos i dy gartre di.

¹¹Achos bydd e'n gorchymyn i'w angylion dy amddiffyn di ble bynnag rwyt ti'n mynd.

¹²Byddan nhw'n dy ddal yn eu breichiau fel na fyddi'n taro dy droed ar garreg.

¹³Byddi di'n sathru'r llew a'r cobra dan draed; fydd llewod ifanc a nadroedd ddim yn beryg i ti.

¹⁴“Dw i'n mynd i gadw'r un sy'n ffyddlon i mi yn saff,” meddai'r ARGLWYDD; “bydda i'n amddiffyn yr un sy'n fy nabod i.

¹⁵Pan fydd e'n galw arna i, bydda i'n ateb. Bydda i gydag e drwy bob argyfwng. Bydda i'n ei achub e ac yn ei anrhydeddu.

¹⁶Bydd e'n cael byw i oedran teg, a mwynhau bywyd, am fy mod wedi ei achub.”