Read Gobaith i Gymru Salm 92 Bible Online

Salm 92 - Gobaith i Gymru bible

Salm 92

¹Salm. Cân ar gyfer y dydd saboth. [1] Mae'n beth da diolch i'r ARGLWYDD, a chanu mawl i dy enw di, y Duw Goruchaf.

²Canu yn y bore am dy gariad, a chyda'r nos am dy ffyddlondeb,

³i gyfeiliant offeryn dectant a nabl a thannau'r delyn.

⁴Ti'n fy ngwneud i mor hapus, O ARGLWYDD; a dw i'n canu'n uchel o achos y cwbl rwyt ti'n wneud.

⁵Ti'n gwneud pethau mawr, O ARGLWYDD! Mae dy feddyliau di mor ddwfn!

⁶Dim ond twpsyn sydd ddim yn gweld hynny; dim ond ffŵl fyddai ddim yn deall!

⁷Mae pobl ddrwg yn llwyddo — ond maen nhw fel glaswellt — Er bod y rhai sy'n gwneud drwg fel petaen nhw'n blodeuo, byddan nhw'n cael eu dinistrio am byth!

⁸Ond ti ydy'r Un sydd uwchlaw popeth, a hynny am byth, O ARGLWYDD.

⁹Bydd dy elynion di, ARGLWYDD, bydd dy elynion di yn cael eu dinistrio! Bydd pawb sy'n gwneud drygioni yn cael eu gwasgaru!

¹⁰Ti wedi fy ngwneud i'n gryf fel ych gwyllt; ti wedi fy eneinio i ag olew iraidd.

¹¹Bydda i'n cael gweld y gelynion sy'n fy ngwylio yn cael eu trechu; a chlywed y rhai drwg sy'n ymosod arna i yn chwalu.

¹²Ond bydd y rhai cyfiawn yn blodeuo fel palmwydd; ac yn tyfu'n gryf fel coed cedrwydd yn Libanus.

¹³Maen nhw wedi eu plannu yn nheml yr ARGLWYDD, ac yn blodeuo yn yr iard sydd yno.

¹⁴Byddan nhw'n dal i roi ffrwyth pan fyddan nhw'n hen; byddan nhw'n dal yn ffres ac yn llawn sudd.

¹⁵Maen nhw'n cyhoeddi fod yr ARGLWYDD yn gyfiawn — mae e'n graig saff i mi, a does dim anghyfiawnder yn agos ato.