Read Gobaith i Gymru Salm 94 Bible Online

Salm 94 - Gobaith i Gymru bible

Salm 94

¹O Dduw sy'n dial pob cam! O ARGLWYDD! O Dduw sy'n dial pob cam, disgleiria!

²Cod ar dy draed, Farnwr y ddaear, a rhoi beth maen nhw'n haeddu i'r rhai balch!

³Am faint mwy mae'r rhai drwg, O ARGLWYDD — am faint mwy mae'r rhai drwg i gael dathlu?

⁴Maen nhw'n chwydu eu geiriau balch wrth frolio eu hunain.

⁵Maen nhw'n sathru dy bobl dan draed, O ARGLWYDD, ac yn cam-drin dy etifeddiaeth.

⁶Mae'n nhw'n lladd y gweddwon a'r mewnfudwyr, ac yn llofruddio'r plant amddifad.

⁷Maen nhw'n meddwl, “Dydy'r ARGLWYDD ddim yn gweld, dydy Duw Jacob yn cymryd dim sylw.”

⁸Chi bobl dwp, mae'n bryd i chi ddeall! Chi ffyliaid, pryd ydych chi'n mynd i gallio?

⁹Ydy'r un roddodd siâp i'r glust ddim yn clywed? Ydy'r un wnaeth greu y llygad ddim yn gweld?

¹⁰Ydy'r un sy'n disgyblu'r cenhedloedd ddim yn cosbi? — Fe ydy'r un sy'n dysgu gwersi i'r ddynoliaeth!

¹¹Mae'r ARGLWYDD yn gwybod fod cynlluniau dynol yn wastraff amser, fel tarth yn diflannu!

¹²Mae'r un sy'n cael ei ddisgyblu gen ti wedi ei fendithio'n fawr, ARGLWYDD; yr un rwyt ti'n dysgu dy gyfraith iddo.

¹³Mae'n dawel ei feddwl pan mae pethau'n anodd. Mae'n gwybod y bydd y rhai drwg yn syrthio i dwll.

¹⁴Fydd yr ARGLWYDD ddim yn siomi ei bobl. Fydd e ddim yn troi cefn ar ei etifeddiaeth.

¹⁵Cyfiawnder fydd yn cario'r dydd, a'r rhai sy'n byw'n gywir yn ei ddilyn.

¹⁶Oes rhywun am ochri gyda fi yn erbyn y rhai drwg? Oes rhywun am sefyll hefo fi yn erbyn pobl ddrwg?

¹⁷Na, byddai ar ben arna i oni bai fod yr ARGLWYDD wedi fy helpu!

¹⁸Pan oeddwn i'n dweud, “Dw i'n llithro! Mae ar ben arna i!” roedd dy ffyddlondeb di, O ARGLWYDD, yn fy nghynnal.

¹⁹Pan oeddwn i'n poeni am bob math o bethau, roedd dy gefnogaeth di yn fy ngwneud i'n llawen.

²⁰Wyt ti'n gallu partneru gyda llywodraeth anghyfiawn sy'n achosi dioddefaint trwy ei deddfau?

²¹Maen nhw'n casglu at ei gilydd yn erbyn y cyfiawn; ac yn condemnio pobl ddiniwed i farwolaeth.

²²Ond mae'r ARGLWYDD yn gaer ddiogel i mi; mae fy Nuw yn graig lle dw i'n hollol saff.

²³Bydd e'n talu'n ôl iddyn nhw am eu drygioni! Bydd e'n defnyddio eu drygioni eu hunain i'w dinistrio! Bydd yr ARGLWYDD ein Duw yn eu dinistrio nhw!