Read Gobaith i Gymru Diarhebion 10 Bible Online

Diarhebion 10 - Gobaith i Gymru bible

Diarhebion 10

¹Diarhebion Solomon: Mae plentyn doeth yn gwneud ei dad yn hapus; ond plentyn ffôl yn gwneud ei fam yn drist.

²Dydy ennill ffortiwn trwy dwyll o ddim lles, ond mae gonestrwydd yn achub bywyd o berygl marwol.

³Dydy'r ARGLWYDD ddim yn gadael i rywun cyfiawn lwgu, Ond mae'n rhwystro'r rhai drwg rhag cael beth maen nhw eisiau.

⁴Mae diogi yn arwain i dlodi, ond gwaith caled yn ennill cyfoeth.

⁵Mae'r un sy'n casglu ei gnwd yn yr haf yn gall, ond yr un sy'n cysgu drwy'r cynhaeaf yn achosi cywilydd.

⁶Mae cawodydd o fendith yn disgyn ar y cyfiawn, ond mae geiriau pobl ddrwg yn cuddio creulondeb.

⁷Mae'n fendith cofio am rywun cyfiawn, ond bydd enw'r drwg yn pydru.

⁸Mae'r un sy'n ddoeth yn derbyn cyngor, ond mae'r ffŵl sy'n siarad dwli yn syrthio.

⁹Mae'r un sy'n byw yn onest yn byw'n ddibryder, Ond bydd y gwir yn dod i'r golwg am yr un sy'n twyllo.

¹⁰Mae'r un sy'n wincio o hyd yn creu helynt; [4†] ond mae'r sawl sy'n ceryddu'n agored yn dod â heddwch. [5]

¹¹Mae geiriau person cyfiawn yn ffynnon sy'n rhoi bywyd, ond mae geiriau pobl ddrwg yn cuddio creulondeb.

¹²Mae casineb yn codi twrw, ond mae cariad yn cuddio pob bai.

¹³Mae pobl gall yn siarad yn ddoeth, ond gwialen sydd ei angen ar rai sydd heb synnwyr cyffredin.

¹⁴Mae pobl ddoeth yn storio gwybodaeth; ond mae siarad dwl yn dod â dinistr yn agos.

¹⁵Mae holl eiddo'r cyfoethog fel caer ddiogel; ond tlodi'r tlawd yn ddinistr.

¹⁶Gwobr y person sy'n byw'n iawn ydy bywyd; ond cosb am bechod ydy cyflog pobl ddrwg.

¹⁷Mae derbyn cyngor yn arwain i fywyd, ond gwrthod gwrando ar gerydd yn arwain ar gyfeiliorn.

¹⁸Mae'r un sy'n cuddio casineb yn twyllo, a'r sawl sy'n enllibio pobl eraill yn ffŵl.

¹⁹Mae siarad gormod yn siŵr o dramgwyddo rhywun; mae'r person call yn brathu ei dafod.

²⁰Mae geiriau person da fel arian gwerthfawr, ond dydy syniadau pobl ddrwg yn dda i ddim.

²¹Mae cyngor person da yn fwyd i gynnal pobl, ond mae ffyliaid yn marw o ddiffyg synnwyr cyffredin.

²²Bendith yr ARGLWYDD sy'n cyfoethogi bywyd, dydy ymdrech dynol yn ychwanegu dim ato.

²³Mae ffŵl yn cael sbort wrth wneud drygau, ond doethineb sy'n rhoi mwynhad i bobl gall.

²⁴Bydd yr hyn mae pobl ddrwg yn ei ofni yn digwydd iddyn nhw; ond bydd rhai sy'n byw'n iawn yn cael beth maen nhw eisiau.

²⁵Fydd dim sôn am bobl ddrwg pan fydd y corwynt wedi mynd heibio, Ond mae sylfeini'r rhai sy'n byw'n iawn yn aros yn gadarn.

²⁶Mae anfon rhywun diog ar neges, fel yfed finegr, neu gael mwg yn eich llygaid.

²⁷Mae parchu'r ARGLWYDD yn rhoi bywyd hir i chi, ond mae blynyddoedd y rhai drwg yn cael eu byrhau.

²⁸Gall y cyfiawn edrych ymlaen at lawenydd, ond does gan bobl ddrwg ddim gobaith.

²⁹Mae'r ARGLWYDD yn gaer i amddiffyn y rhai sy'n byw yn iawn, ond bydd pobl ddrwg yn cael eu dinistrio.

³⁰Fydd y cyfiawn byth yn cael ei symud; ond fydd y rhai drwg ddim yn cael byw yn y tir.

³¹Mae'r rhai sy'n gwneud beth sy'n iawn yn siarad yn gall, ond bydd y rhai sy'n twyllo yn cael eu tewi.

³²Mae'r cyfiawn yn gwybod beth sy'n iawn i'w ddweud; ond mae pobl ddrwg yn twyllo.