Read Gobaith i Gymru Diarhebion 11 Bible Online

Diarhebion 11 - Gobaith i Gymru bible

Diarhebion 11

¹Mae'n gas gan yr ARGLWYDD glorian dwyllodrus; ond mae defnyddio pwysau cywir wrth ei fodd.

²Mae snobyddiaeth yn arwain at gywilydd, pobl wylaidd ydy'r rhai doeth.

³Mae gonestrwydd yn arwain y rhai sy'n gwneud beth sy'n iawn; ond mae twyll yn dinistrio'r rhai sy'n twyllo.

⁴Fydd cyfoeth yn dda i ddim ar ddydd y farn, ond mae byw yn iawn yn achub bywyd.

⁵Mae cyfiawnder rhywun gonest yn dangos y ffordd iawn iddo, ond mae'r un sy'n gwneud drwg yn syrthio o achos ei ddrygioni.

⁶Mae cyfiawnder rhywun gonest yn ei achub ond mae'r un sy'n twyllo yn cael ei ddal gan ei driciau.

⁷Pan mae rhywun drwg yn marw, dyna ni — does dim gobaith dydy'r cyfoeth oedd ganddo yn dda i ddim bellach.

⁸Mae'r cyfiawn yn cael ei achub rhag helyntion, a'r un sy'n gwneud drwg yn gorfod cymryd ei le!

⁹Mae'r annuwiol yn dinistrio pobl gyda'i eiriau, ond mae'r cyfiawn yn deall hynny ac yn cael ei arbed.

¹⁰Pan mae'r cyfiawn yn llwyddo mae'r ddinas wrth ei bodd; mae gweiddi llawen ynddi pan mae'r rhai drwg yn cael eu dinistrio.

¹¹Mae dinas yn ffynnu pan mae pobl dda yn cael eu bendithio, ond mae geiriau pobl ddrwg yn ei dinistrio hi.

¹²Does dim sens gan rywun sy'n bychanu pobl eraill; mae'r person call yn cadw'n dawel.

¹³Mae'r un sy'n hel clecs yn bradychu cyfrinach, [6†] ond mae ffrind go iawn yn cadw cyfrinach.

¹⁴Heb arweiniad clir mae gwlad yn methu, mae llwyddiant yn dod gyda digon o gyngor doeth.

¹⁵Mae gwarantu benthyciad i rywun dieithr yn gofyn am drwbwl; gwell bod yn saff a gwrthod.

¹⁶Mae gwraig hael yn ennill parch; mae dynion creulon yn cipio cyfoeth.

¹⁷Mae person caredig yn gwneud lles iddo'i hun, a rhywun sy'n greulon yn achosi trwbwl iddo'i hun.

¹⁸Dydy'r elw mae pobl ddrwg yn ei wneud yn ddim byd ond rhith, ond mae'r rhai sy'n gweithio dros gyfiawnder yn cael gwobr go iawn.

¹⁹Mae gwir gyfiawnder yn arwain at fywyd, ond dilyn y drwg yn arwain at farwolaeth.

²⁰Mae'n gas gan yr ARGLWYDD bobl sy'n twyllo, ond mae'r rhai sy'n byw yn onest yn rhoi pleser iddo.

²¹Fydd pobl ddrwg yn sicr ddim yn osgoi cosb, ond bydd y rhai sy'n byw'n iawn yn cael mynd yn rhydd.

²²Mae gwraig hardd heb sens fel modrwy aur yn nhrwyn hwch.

²³Dydy'r cyfiawn ond eisiau gwneud beth sy'n dda; ond mae gobaith pobl ddrwg yn arwain i ddigofaint.

²⁴Mae un yn rhoi yn hael, ac yn ennill mwy o gyfoeth; ac un arall yn grintachlyd, ac ar ei golled.

²⁵Mae'r bobl sy'n fendith i eraill yn llwyddo; a'r rhai sy'n rhoi dŵr i eraill yn cael eu diwallu.

²⁶Mae'r un sy'n cadw ei ŷd iddo'i hun yn haeddu melltith, ond mae'r un sy'n ei werthu yn cael ei fendithio.

²⁷Mae'r un sy'n ymdrechu i wneud da yn ennill ffafr; ond drwg ddaw ar y rhai sy'n edrych am helynt.

²⁸Bydd rhywun sy'n dibynnu ar ei gyfoeth yn syrthio, ond y rhai sy'n byw yn iawn yn blodeuo.

²⁹Bydd yr un sy'n creu trwbwl i'w deulu yn etifeddu dim; bydd y ffŵl yn gaethwas i rywun sydd wedi bod yn ddoeth.

³⁰Mae byw yn iawn yn dwyn ffrwyth, fel coeden sy'n rhoi bywyd; ond mae trais yn lladd pobl. [7]

³¹Os ydy'r rhai sy'n gwneud beth sy'n iawn yn cael eu tâl ar y ddaear, beth ddaw o'r rhai drwg sy'n anufudd i Dduw?