Read Gobaith i Gymru Diarhebion 12 Bible Online

Diarhebion 12 - Gobaith i Gymru bible

Diarhebion 12

¹Mae rhywun sy'n barod i gael ei gywiro yn caru gwybodaeth; ond mae'r un sy'n gwrthod derbyn cerydd yn ddwl!

²Mae pobl dda yn profi ffafr yr ARGLWYDD, ond mae'r rhai sydd â chynlluniau cyfrwys yn cael eu cosbi ganddo.

³Dydy drygioni ddim yn rhoi sylfaen gadarn i fywyd, ond mae gwreiddiau dwfn gan y rhai sy'n byw yn iawn.

⁴Mae gwraig dda yn gwneud i'w gŵr deimlo fel brenin, ond mae un sy'n codi cywilydd arno fel cancr i'r esgyrn.

⁵Mae bwriadau'r rhai sy'n byw yn iawn yn dda, ond cyngor pobl ddrwg yn dwyllodrus.

⁶Mae geiriau pobl ddrwg yn barod i ymosod a lladd, ond bydd beth mae pobl gyfiawn yn ei ddweud yn eu hachub nhw.

⁷Mae pobl ddrwg yn cael eu dymchwel ac yn diflannu, ond mae cartrefi pobl dda yn sefyll yn gadarn.

⁸Mae person deallus yn cael enw da; ond mae'r rhai sy'n twyllo yn cael eu dirmygu.

⁹Mae'n well bod yn neb o bwys a gweithio i gynnal eich hun na chymryd arnoch eich bod yn rhywun ac eto heb fwyd.

¹⁰Mae pobl dda yn gofalu am eu hanifeiliaid, ond mae hyd yn oed ‛tosturi‛ pobl ddrwg yn greulon!

¹¹Bydd yr un sy'n trin ei dir yn cael digon o fwyd, ond does dim sens gan yr un sy'n gwastraffu amser.

¹²Mae pobl ddrwg yn blysio am ffrwyth eu drygioni; ond gwreiddiau y cyfiawn sy'n rhoi cnwd.

¹³Mae geiriau pobl ddrwg yn eu baglu nhw, ond mae'r un sy'n gwneud y peth iawn yn dianc rhag trafferthion.

¹⁴Mae rhywun yn derbyn canlyniadau beth mae'n ei ddweud; ac yn cael ei dalu am beth mae'n ei wneud.

¹⁵Mae'r ffŵl byrbwyll yn meddwl ei fod e'n gwybod orau; ond mae'r person doeth yn derbyn cyngor.

¹⁶Mae'r ffŵl yn dangos ar unwaith ei fod wedi gwylltio, ond mae'r person call yn anwybyddu'r ffaith ei fod wedi ei sarhau.

¹⁷Mae tyst gonest yn dweud y gwir, ond tyst celwyddog yn twyllo.

¹⁸Mae siarad yn fyrbwyll fel cleddyf yn trywanu, ond mae geiriau doeth yn iacháu.

¹⁹Mae geiriau gwir yn aros bob amser, ond celwydd yn para ond am ennyd.

²⁰Twyllo ydy bwriad y rhai sy'n cynllwyn i wneud drwg; ond mae'r rhai sy'n hybu heddwch yn profi llawenydd.

²¹Fydd y rhai sy'n gwneud beth sy'n iawn yn cael dim niwed, ond bydd pobl ddrwg yn cael llwythi o drafferthion.

²²Mae'n gas gan yr ARGLWYDD gelwydd, ond mae'r rhai sy'n dweud y gwir yn ei blesio.

²³Mae person call yn cuddio beth mae'n ei wybod, ond mae ffyliaid yn cyhoeddi eu nonsens.

²⁴Pobl sy'n gweithio'n galed fydd yn arweinwyr; bydd y rhai diog yn cael eu hunain yn gaethweision.

²⁵Mae pryder yn gallu llethu rhywun, ond mae gair caredig yn codi calon.

²⁶Mae'r un sy'n gwneud beth sy'n iawn yn dangos y ffordd i'w ffrind, ond mae person drwg yn arwain rhywun ar gyfeiliorn.

²⁷Does gan rywun diog byth helfa i'w rostio, ond mae gan y gweithiwr caled gyfoeth gwerthfawr.

²⁸Mae byw yn iawn yn arwain i fywyd, ond ffordd arall yn arwain i farwolaeth.