Read Gobaith i Gymru Diarhebion 13 Bible Online

Diarhebion 13 - Gobaith i Gymru bible

Diarhebion 13

¹Mae plentyn doeth yn gwrando pan mae ei dad yn ei gywiro, ond dydy plant sy'n meddwl eu bod nhw'n gwybod yn well ddim yn gwrando ar gerydd.

²Mae canlyniadau da i eiriau caredig, ond dydy'r twyllwr yn cynnig dim byd ond trais.

³Mae'r person sy'n ffrwyno'i dafod yn diogelu ei hun, ond yr un sy'n methu cau ei geg yn dinistrio ei hun.

⁴Mae'r person diog eisiau pethau, ond yn cael dim; ond bydd y person gweithgar yn cael popeth mae e eisiau.

⁵Mae'r person cyfiawn yn casáu celwydd; ond y person drwg yn dwyn cywilydd a gwarth arno'i hun.

⁶Mae cyfiawnder yn amddiffyn y rhai sy'n byw yn iawn; Ond mae'r pechadur yn cael ei faglu gan ei ddrygioni.

⁷Mae un heb ddim yn cymryd arno ei fod yn gyfoethog, ac un arall yn gyfoethog yn cymryd arno ei fod yn dlawd.

⁸Gall y cyfoethog gael ei fygwth am ei gyfoeth, ond dydy'r person tlawd ddim yn cael y broblem yna.

⁹Mae golau'r cyfiawn yn disgleirio'n llachar; ond mae'r person drwg fel lamp sy'n diffodd.

¹⁰Dydy balchder yn gwneud dim ond creu trafferthion; mae pobl ddoeth yn derbyn cyngor.

¹¹Mae cyfoeth gafodd ei ennill heb ymdrech yn diflannu'n hawdd, ond bydd cyfoeth sydd wedi ei gasglu o dipyn i beth yn cynyddu.

¹²Mae gobaith sy'n cael ei ohirio yn torri'r galon, ond mae dymuniad sy'n dod yn wir fel pren sy'n rhoi bywyd.

¹³Bydd pethau'n mynd yn ddrwg i'r un sy'n gwrthod cyngor; ond bydd y person sy'n gwrando ar orchymyn yn cael ei wobrwyo.

¹⁴Mae dysgu gan rai doeth fel ffynnon sy'n rhoi bywyd, ac yn ei gadw rhag syrthio i faglau marwolaeth.

¹⁵Mae dangos tipyn o sens yn ennill ffafr; ond mae byw fel twyllwr yn arwain at ddinistr.

¹⁶Mae pawb call yn gwneud beth sy'n ddoeth, ond mae'r ffŵl yn dangos ei dwpdra.

¹⁷Mae negesydd gwael yn achosi dinistr; ond mae negesydd ffyddlon yn dod â iachâd.

¹⁸Tlodi a chywilydd fydd i'r un sy'n gwrthod cael ei gywiro; ond bydd y sawl sy'n gwrando ar gerydd yn cael ei ganmol.

¹⁹Mae dymuniad wedi ei gyflawni yn beth melys; ond mae'n gas gan ffyliaid droi cefn ar ddrwg.

²⁰Mae cwmni pobl ddoeth yn eich gwneud chi'n ddoeth, ond mae cadw cwmni ffyliaid yn gofyn am drwbwl.

²¹Mae helyntion yn dilyn pechaduriaid, ond bydd bywyd yn dda i'r rhai sy'n byw'n gyfiawn.

²²Mae person da yn gadael etifeddiaeth i'w wyrion a'i wyresau, ond mae cyfoeth pechaduriaid yn mynd i'r rhai sy'n byw'n gyfiawn.

²³Mae digon o fwyd yn tyfu ar dir pobl dlawd; ond mae anghyfiawnder yn ei ysgubo i ffwrdd.

²⁴Mae'r sawl sy'n atal y wialen yn casáu ei blentyn; mae'r un sy'n ei garu yn ei ddisgyblu o'r dechrau cyntaf.

²⁵Mae gan bobl gyfiawn ddigon i'w fwyta, ond boliau gwag sydd gan bobl ddrwg.