Read Gobaith i Gymru Diarhebion 15 Bible Online

Diarhebion 15 - Gobaith i Gymru bible

Diarhebion 15

¹Mae ateb caredig yn tawelu tymer; ond dweud pethau cas yn gwylltio pobl.

²Mae geiriau person doeth yn hybu gwybodaeth, ond mae cegau ffyliaid yn chwydu ffolineb.

³Mae'r ARGLWYDD yn gweld popeth, mae'n gwylio'r drwg a'r da.

⁴Mae gair caredig fel coeden sy'n rhoi bywyd, ond mae dweud celwydd yn torri calon.

⁵Mae'r ffŵl yn diystyru disgyblaeth ei dad, ond mae'r sawl sy'n gwrando ar gerydd yn gall.

⁶Mae digon o gyfoeth yn nhŷ person cyfiawn, ond trafferthion fydd unig gyflog pobl ddrwg.

⁷Mae pobl ddoeth yn rhannu gwybodaeth; ond dydy ffyliaid ddim yn gwneud hynny.

⁸Mae'n gas gan yr ARGLWYDD offrymau pobl ddrwg, ond mae gweddi'r rhai sy'n byw yn iawn yn ei blesio.

⁹Mae'n gas gan yr ARGLWYDD ymddygiad pobl ddrwg, ond mae'n caru'r rhai sy'n trïo byw'n iawn.

¹⁰Mae'r un sydd wedi troi cefn ar y ffordd yn cael ei ddisgyblu'n llym; bydd yr un sy'n gwrthod cael ei gywiro yn marw.

¹¹Mae'r ARGLWYDD yn gweld beth sy'n digwydd yn Annwn [8], felly mae'n sicr yn gwybod beth sy'n mynd trwy feddyliau pobl!

¹²Dydy'r un sy'n gwawdio pobl eraill ddim yn hoffi cael ei gywiro; dydy e ddim yn fodlon gofyn cyngor gan rywun doeth.

¹³Mae calon lawen yn rhoi gwên ar yr wyneb; ond mae calon drist yn llethu'r ysbryd.

¹⁴Mae person call eisiau dysgu mwy; ond mae ffŵl yn cael ei fwydo ar ffolineb.

¹⁵Mae pobl sy'n diodde yn cael bywyd caled, ond mae bodlonrwydd fel gwledd ddiddiwedd.

¹⁶Mae ychydig bach gan rywun sy'n parchu'r ARGLWYDD yn well na chyfoeth mawr gyda helbulon.

¹⁷Mae platiaid o lysiau ble mae cariad yn well na gwledd o gig eidion â chasineb.

¹⁸Mae rhywun sy'n fyr ei dymer yn creu helynt; ond mae person amyneddgar yn tawelu ffrae.

¹⁹Mae'r ffordd mae person diog yn ymddwyn fel llwyn o fieri, ond mae llwybr yr un sy'n gwneud beth sy'n iawn fel priffordd agored.

²⁰Mae plentyn doeth yn gwneud ei dad yn hapus; ond plentyn ffôl yn dangos dim parch at ei fam. [9†]

²¹Mae chwarae'r ffŵl yn hwyl i rywun heb sens; ond mae person call yn cadw ar y llwybr iawn.

²²Mae cynlluniau'n mynd ar chwâl heb ymgynghori, ond yn llwyddo pan fydd llawer yn rhoi cyngor.

²³Mae ateb parod yn gwneud rhywun yn hapus, ac mor dda ydy gair yn ei bryd!

²⁴Mae llwybr bywyd ar i fyny i'r doeth, ac yn ei droi oddi wrth Annwn [10] isod.

²⁵Bydd yr ARGLWYDD yn chwalu tŷ y balch, ond mae'n gwneud eiddo'r weddw yn ddiogel.

²⁶Mae'n gas gan yr ARGLWYDD feddyliau drwg, ond mae geiriau caredig yn bur yn ei olwg.

²⁷Mae rhywun sy'n elwa ar draul eraill yn creu trwbwl i'w deulu; ond bydd yr un sy'n gwrthod breib yn cael byw.

²⁸Mae'r person cyfiawn yn meddwl cyn ateb, tra mae'r person drwg yn chwydu aflendid.

²⁹Mae'r ARGLWYDD yn cadw draw oddi wrth bobl ddrwg, ond mae'n gwrando ar weddi'r rhai sy'n byw'n gywir.

³⁰Mae gwên yn llonni'r galon; a newyddion da yn rhoi cryfder i'r corff.

³¹Mae'r glust sy'n gwrando ar gerydd buddiol yn byw yng nghwmni'r doeth.

³²Mae'r un sy'n gwrthod cael ei gywiro yn ei gasáu ei hun; ond yr un sy'n gwrando ar gerydd yn dangos synnwyr.

³³Mae parchu'r ARGLWYDD yn dysgu rhywun i fod yn ddoeth; a gostyngeiddrwydd yn arwain i anrhydedd.