Read Gobaith i Gymru Diarhebion 16 Bible Online

Diarhebion 16 - Gobaith i Gymru bible

Diarhebion 16

¹Mae pobl yn gallu gwneud penderfyniadau, ond yr ARGLWYDD sydd a'r gair olaf.

²Mae pobl bob amser yn meddwl eu bod yn gwneud y peth iawn, ond mae'r ARGLWYDD yn pwyso a mesur y cymhellion.

³Rho bopeth wnei di yn nwylo'r ARGLWYDD, a bydd dy gynlluniau'n llwyddo.

⁴Mae gan yr ARGLWYDD bwrpas i bopeth mae'n ei wneud, hyd yn oed pobl ddrwg ar gyfer dydd dinistr.

⁵Mae'n gas gan yr ARGLWYDD bobl falch; fyddan nhw'n sicr ddim yn osgoi cael eu cosbi.

⁶Mae caredigrwydd a ffyddlondeb yn cuddio beiau pobl eraill, a dangos parch at yr ARGLWYDD yn troi rhywun oddi wrth ddrwg.

⁷Pan mae ymddygiad rhywun yn plesio'r ARGLWYDD, mae hyd yn oed ei elynion yn troi'n ffrindiau.

⁸Mae'n well cael ychydig a byw'n iawn, na chael cyfoeth mawr drwy fod yn anonest.

⁹Mae pobl yn gallu cynllunio beth i'w wneud, ond yr ARGLWYDD sy'n arwain y ffordd.

¹⁰Y brenin sy'n dweud beth ydy beth; dydy e byth yn barnu'n annheg.

¹¹Mae'r ARGLWYDD eisiau clorian teg; rhaid i bob un o'r pwysau sy'n y gôd fod yn gywir.

¹²Mae brenhinoedd yn casáu torcyfraith, am mai cyfiawnder sy'n gwneud gorsedd yn ddiogel.

¹³Mae dweud y gwir yn ennill ffafr brenhinoedd; maen nhw'n hoffi pobl onest.

¹⁴Mae gwylltio brenin yn arwain i farwolaeth ond bydd person doeth yn gallu ei dawelu.

¹⁵Mae gwên ar wyneb y brenin yn arwain i fywyd; mae ei ffafr fel cwmwl glaw yn y gwanwyn.

¹⁶Mae dysgu bod yn ddoeth yn llawer gwell nag aur; a chael deall yn well nag arian.

¹⁷Mae ffordd glir o flaen yr un sy'n osgoi drygioni; ac mae'r person sy'n gwylio ble mae'n mynd yn saff.

¹⁸Mae balchder yn dod o flaen dinistr, a brolio cyn baglu.

¹⁹Mae'n well bod yn ostyngedig gyda'r anghenus na rhannu ysbail gyda'r balch.

²⁰Mae'r un sy'n gwrando ar neges Duw yn llwyddo; a'r un sy'n trystio'r ARGLWYDD yn hapus.

²¹Mae'r person doeth yn cael ei gyfri'n gall; ac mae geiriau caredig yn helpu rhywun i ddysgu.

²²Mae synnwyr cyffredin fel ffynnon sy'n rhoi bywyd i rywun, ond mae ffyliaid yn talu'r pris am eu ffolineb.

²³Mae person doeth yn meddwl cyn siarad; mae ei eiriau yn dwyn perswâd.

²⁴Mae geiriau caredig fel diliau mêl, yn felys eu blas ac yn iach i'r corff.

²⁵Mae yna ffordd o fyw sy'n edrych yn iawn i bobl, ond arwain i farwolaeth mae hi yn y pen draw.

²⁶Mae'r angen am fwyd yn gwneud i rywun weithio'n galed, a bol gwag yn ei yrru yn ei flaen.

²⁷Mae dihiryn drwg yn chwilio am helynt, ac mae ei eiriau'n gwneud niwed fel tân.

²⁸Mae person croes yn achosi cynnen, a'r un sy'n hel clecs yn chwalu ffrindiau.

²⁹Mae person treisgar yn denu pobl, ac yn eu harwain nhw i wneud pethau sydd ddim yn dda.

³⁰Mae'n wincio pan mae'n bwriadu twyllo, a rhoi ei fys ar ei wefusau wrth wneud drwg.

³¹Mae gwallt gwyn fel coron hardd; mae i'w chael wrth fyw yn gyfiawn.

³²Mae ymatal yn well nag ymosod, a rheoli'r tymer yn well na choncro dinas.

³³Mae'r deis yn cael ei daflu, ond mae'r canlyniad yn llaw'r ARGLWYDD.