Read Gobaith i Gymru Diarhebion 17 Bible Online

Diarhebion 17 - Gobaith i Gymru bible

Diarhebion 17

¹Mae crystyn sych a thipyn o heddwch yn well na gwledd fawr lle mae pobl yn ffraeo.

²Bydd gwas da yn rheoli mab sy'n achos cywilydd, a bydd yn rhannu'r etifeddiaeth fel un o'r teulu.

³Tawddlestr i arian, a ffwrnais i aur, ond yr ARGLWYDD sy'n profi'r galon.

⁴Mae'r rhai sy'n gwneud drwg yn gwrando ar gyngor drwg; a'r un sy'n dweud celwydd yn rhoi sylw i eiriau maleisus.

⁵Mae'r sawl sy'n chwerthin ar y tlawd yn amharchu ei Grëwr; a bydd yr un sy'n mwynhau gweld trychineb yn cael ei gosbi.

⁶Coron pobl mewn oed ydy eu wyrion a'u wyresau, a balchder plant ydy eu rhieni.

⁷Dydy geiriau gwych ddim yn gweddu i ffŵl; llai fyth celwydd i ŵr bonheddig.

⁸Mae breib fel swyn i'r un sy'n ei gynnig; ble bynnag mae'n troi, mae'n llwyddo.

⁹Mae'r sawl sy'n cuddio bai yn ceisio cyfeillgarwch, ond yr un sy'n hel clecs yn colli ffrindiau.

¹⁰Mae gair o gerydd yn gwneud mwy o argraff ar ddyn doeth na chwipio ffŵl gant o weithiau.

¹¹Dydy rhywun drwg ond eisiau gwrthryfela; felly bydd swyddog creulon yn cael ei anfon yn ei erbyn.

¹²Gwell cyfarfod arthes wedi colli ei chenawon na ffŵl yn siarad nonsens.

¹³Fydd trafferthion byth yn gadael tŷ rhywun sy'n talu drwg am dda.

¹⁴Mae dechrau ffrae fel crac mewn argae; gwell tewi cyn i bethau fynd yn draed moch.

¹⁵Dau beth sy'n gas gan yr ARGLWYDD — gollwng yr euog yn rhydd a chosbi'r dieuog.

¹⁶Wnaiff arian yn llaw ffŵl ddim prynu doethineb. Pam talu am wersi, ac yntau ddim eisiau deall?

¹⁷Mae ffrind yn ffyddlon bob amser; a brawd wedi ei eni i helpu mewn helbul.

¹⁸Does dim sens gan rywun sy'n cytuno i dalu dyled rhywun arall. [11†]

¹⁹Mae'r un sy'n hoffi tramgwyddo yn hoffi trafferthion; a'r un sy'n brolio yn gofyn am drwbwl.

²⁰Fydd yr un sy'n twyllo ddim yn llwyddo; mae'r rhai sy'n edrych am helynt yn mynd i drafferthion.

²¹Mae'r un sy'n magu plentyn ffôl yn profi tristwch; does dim mwynhad i dad plentyn gwirion.

²²Mae llawenydd yn iechyd i'r corff; ond mae iselder ysbryd yn sychu'r esgyrn.

²³Person drwg sy'n derbyn breib yn dawel bach i wyrdroi cyfiawnder. [12†]

²⁴Mae'r person craff yn gweld yn glir beth sy'n ddoeth; ond dydy'r ffŵl ddim yn gwybod ble i edrych.

²⁵Mae plentyn ffôl yn achosi gofid i'w dad a dolur calon i'w fam.

²⁶Dydy cosbi rhywun dieuog ddim yn iawn; byddai fel rhoi curfa i swyddog llys am fod yn onest.

²⁷Mae'r un sy'n brathu ei dafod yn dangos synnwyr cyffredin; a'r person pwyllog yn dangos ei fod yn gall.

²⁸Gall hyd yn oed ffŵl sy'n cadw'n dawel gael ei ystyried yn ddoeth; a'r un sy'n cau ei geg, yn ddeallus.