Read Gobaith i Gymru Diarhebion 18 Bible Online

Diarhebion 18 - Gobaith i Gymru bible

Diarhebion 18

¹Mae'r un sy'n cadw ar wahân yn plesio ei hun, ac yn gwrthod unrhyw gyngor doeth.

²Does gan ffŵl ddim awydd o gwbl i ddeall, dim ond lleisio'i farn ei hun.

³Mae dirmyg yn dilyn y drwg, a gwawdio yn dilyn gwarth.

⁴Mae geiriau rhywun fel dŵr dwfn; ffynnon o ddoethineb fel nant yn llifo.

⁵Dydy dangos ffafr at yr euog ddim yn beth da, na gwrthod cyfiawnder i'r dieuog.

⁶Mae geiriau ffŵl yn achosi ffrae; mae'n gofyn am drwbwl!

⁷Mae siarad ffŵl yn arwain i ddinistr; mae'n cael ei rwydo gan ei eiriau ei hun.

⁸Mae gwrando ar glecs fel bwyd blasus — mae'r cwbl yn cael ei lyncu.

⁹Mae'r un sy'n ddiog yn ei waith yn perthyn yn agos i'r fandal.

¹⁰Mae enw'r ARGLWYDD fel tŵr solet; mae'r rhai sy'n byw'n iawn yn rhedeg ato i fod yn saff.

¹¹Ond caer ddiogel y cyfoethog ydy ei gyfoeth; mae'n dychmygu ei fod yn wal uchel i'w amddiffyn.

¹²Cyn i'r chwalfa ddod roedd digon o frolio; gostyngeiddrwydd sy'n arwain i anrhydedd.

¹³Mae ateb rhywun yn ôl cyn gwrando arno yn beth dwl i'w wneud, ac yn dangos diffyg parch.

¹⁴Gall ysbryd rhywun ei gynnal drwy afiechyd; ond mae iselder ysbryd yn faich trwm i'w gario.

¹⁵Mae'r person call am ddysgu mwy; ac mae'r doeth yn chwilio am wybodaeth.

¹⁶Mae rhoi rhodd i rywun yn agor drysau i gyfarfod pobl bwysig.

¹⁷Mae'r cyntaf i gyflwyno ei dystiolaeth yn ymddangos yn iawn nes i rywun ddod a'i groesholi.

¹⁸Mae taflu coelbren yn rhoi terfyn ar ffraeo, ac yn setlo dadl ffyrnig.

¹⁹Mae perthynas wedi digio yn ystyfnig fel caer; a chwerylon fel barrau i gloi giatiau castell.

²⁰Rhaid i rywun ddysgu byw gyda'i eiriau; mae dweud y peth iawn yn rhoi boddhad.

²¹Mae'r tafod yn gallu rhoi bywyd a marwolaeth; ac mae'r rhai sy'n hoffi siarad yn gorfod byw gyda'u geiriau.

²²Mae'r dyn sydd wedi ffeindio gwraig yn hapus; mae'r ARGLWYDD wedi bod yn dda ato.

²³Mae'r person tlawd yn pledio am help; ond mae'r cyfoethog yn ei ateb yn swta.

²⁴Mae rhai ffrindiau yn gallu brifo rhywun, ond mae ffrind go iawn yn fwy ffyddlon na brawd.