Read Gobaith i Gymru Diarhebion 19 Bible Online

Diarhebion 19 - Gobaith i Gymru bible

Diarhebion 19

¹Mae'n well bod yn dlawd ac yn onest nac yn ffŵl sy'n dweud celwydd.

²Dydy sêl heb ddeall ddim yn beth da; mae'r rhai sydd ar ormod o frys yn colli'r ffordd.

³Ffolineb pobl sy'n difetha eu bywydau, ond maen nhw'n dal dig yn erbyn yr ARGLWYDD.

⁴Mae cyfoeth yn denu llawer o ffrindiau, ond mae ffrind person tlawd yn troi cefn arno.

⁵Bydd tyst celwyddog yn cael ei gosbi; fydd rhywun sy'n palu celwyddau ddim yn dianc.

⁶Mae llawer yn crafu i ennill ffafr pobl bwysig, ac mae pawb eisiau bod yn ffrindiau gyda rhywun hael.

⁷Mae perthnasau rhywun tlawd eisiau cael gwared ag e; does dim syndod fod ei ffrindiau yn ei osgoi! Mae'n gofyn am help, ond does dim ymateb.

⁸Mae'r person doeth yn caru ei fywyd; a'r un sy'n gwneud yn siŵr ei fod yn deall yn hapus.

⁹Bydd tyst celwyddog yn cael ei gosbi; mae wedi darfod ar rywun sy'n palu celwyddau.

¹⁰Dydy byw'n foethus ddim yn gweddu i ffŵl; llai fyth, caethwas yn rheoli ei feistr.

¹¹Mae rhywun call yn rheoli ei dymer; mae i'w ganmol am faddau i rywun sy'n pechu'n ei erbyn.

¹²Mae brenin dig fel llew yn rhuo; ond mae ei ffafr fel gwlith ar laswellt.

¹³Mae plentyn ffôl yn achosi trafferthion i'w dad; a gwraig sy'n swnian fel dŵr yn diferu'n ddi-baid.

¹⁴Mae plant yn etifeddu tŷ ac eiddo gan eu rhieni, ond yr ARGLWYDD sy'n rhoi gwraig ddoeth.

¹⁵Mae diogi yn achosi trwmgwsg; bydd y person diog yn llwgu.

¹⁶Mae'r sawl sy'n cadw'r gorchmynion yn cael byw; ond bydd yr un sy'n diystyru ei ffyrdd yn marw.

¹⁷Mae rhoi yn hael i'r tlawd fel benthyg i'r ARGLWYDD; bydd e'n talu'n ôl iddo am fod mor garedig.

¹⁸Disgybla dy blentyn tra mae gobaith iddo, ond paid colli dy limpyn yn llwyr.

¹⁹Mae'r un sy'n fyr ei dymer yn gorfod talu'r pris; os wyt am ei helpu, byddi'n gorfod gwneud hynny fwy nag unwaith.

²⁰Gwrando ar gyngor, a bydd barod i dderbyn cerydd, a byddi'n ddoeth yn y diwedd.

²¹Mae gan bobl bob math o gynlluniau, ond cynllun yr ARGLWYDD fydd yn cael ei gyflawni.

²²Mae ffyddlondeb yn beth dymunol mewn person; gwell bod yn dlawd na dweud celwydd.

²³Mae parchu'r ARGLWYDD yn arwain i fywyd; mae person felly yn dawel ei feddwl, ac yn ofni dim drwg.

²⁴Mae'r diogyn yn estyn am fwyd, ond yn rhy ddiog i'w godi at ei geg!

²⁵Cura'r un sy'n gwawdio, a bydd y gwirion yn dysgu gwers; cywira rywun call a bydd yn dysgu mwy fyth.

²⁶Mae plentyn sy'n dwyn oddi ar ei dad ac yn gyrru ei fam o'i chartre yn achos cywilydd a gwarth.

²⁷Fy mab, os byddi'n stopio gwrando pan wyt ti'n cael dy gywiro, byddi wedi troi dy gefn ar ddoethineb.

²⁸Mae tyst sy'n twyllo yn dibrisio cyfiawnder, a pobl ddrwg wrth eu boddau gyda chelwydd.

²⁹Bydd y rhai sy'n gwawdio yn cael eu cosbi a'r ffyliaid yn cael eu curo.