Read Gobaith i Gymru Diarhebion 21 Bible Online

Diarhebion 21 - Gobaith i Gymru bible

Diarhebion 21

¹Mae penderfyniadau'r [15] brenin fel sianel ddŵr yn llaw'r ARGLWYDD; mae'n ei arwain i ble bynnag mae e eisiau.

²Mae pobl bob amser yn meddwl eu bod yn gwneud y peth iawn, ond mae'r ARGLWYDD yn pwyso a mesur y cymhellion.

³Mae cael rhywun yn gwneud beth sy'n gyfiawn ac yn deg yn well gan yr ARGLWYDD nag aberthau.

⁴Mae snobyddiaeth a balchder — sy'n nodweddu pobl ddrwg — yn bechod.

⁵Mae llwyddiant yn dod o gynllunio gofalus a gwaith caled; ond dydy brys gwyllt ond yn arwain i dlodi.

⁶Mae ffortiwn wedi ei ennill drwy ddweud celwydd fel tarth sy'n diflannu — magl i farwolaeth.

⁷Mae pobl ddrwg yn cael eu llusgo i ffwrdd gan eu trais, maen nhw'n gwrthod gwneud beth sy'n iawn.

⁸Mae pobl yn gallu bod yn dwyllodrus ac yn rhyfedd, ond mae'r sawl sy'n bur yn gwneud beth sy'n iawn.

⁹Mae byw mewn cornel yn yr atig [16] yn well na rhannu cartref gyda gwraig gecrus.

¹⁰Mae person drwg yn ysu am gael gwneud drwg, ac yn dangos dim trugaredd at bobl eraill.

¹¹Pan mae'r gwawdiwr yn cael ei gosbi mae'r gwirion yn dysgu gwers; ond mae'r person doeth yn dysgu wrth wrando.

¹²Mae'r Duw cyfiawn yn gweld cartrefi pobl ddrwg; bydd yn dod â dinistr arnyn nhw.

¹³Os ydy rhywun yn gwrthod gwrando ar gri'r tlawd, bydd e'n gweiddi hefyd, a fydd neb yn ei ateb.

¹⁴Mae rhodd cyfrinachol yn tawelu llid, a cildwrn yn tewi'r un sydd wedi colli ei dymer.

¹⁵Mae'r rhai cyfiawn wrth eu bodd yn gwneud beth sy'n iawn, ond mae'n ddychryn i bobl ddrwg.

¹⁶Bydd pwy bynnag sy'n crwydro oddi ar y llwybr iawn yn cael ei hun yn gorffwys gyda'r ysbrydion.

¹⁷Bydd y sawl sydd ond eisiau bywyd o bleser yn cael ei hun yn dlawd; dydy gwin a bywyd moethus ddim yn gwneud rhywun yn gyfoethog.

¹⁸Bydd y drwg yn talu'r pris yn lle'r cyfiawn; a'r twyllwr yn diodde yn lle'r un sy'n onest.

¹⁹Mae'n well byw mewn tir anial na gorfod diodde gwraig gecrus a blin.

²⁰Mae'r person doeth yn cynilo, ond mae person ffôl yn gwario'r cwbl sydd ganddo.

²¹Mae'r un sy'n ceisio gwneud beth sy'n iawn a bod yn garedig yn cael bywyd, llwyddiant ac enw da.

²²Mae dyn doeth yn gallu concro dinas sydd â byddin bwerus a bwrw i lawr y gaer oedden nhw'n teimlo'n saff ynddi.

²³Mae'r person sy'n gwylio beth mae'n ei ddweud ac yn ffrwyno'i dafod yn cadw ei hun allan o drafferthion.

²⁴Mae'r person balch, haerllug — yr un sy'n gwawdio pobl eraill — yn gwneud pethau cwbl ddigywilydd.

²⁵Mae blys person diog yn ddigon i'w ladd, am ei fod yn gwrthod gweithio â'i ddwylo.

²⁶Mae'n dyheu ac yn ysu am fwy drwy'r adeg, tra mae'r person cyfiawn yn rhoi yn ddi-baid.

²⁷Mae'n gas gan Dduw aberth sy'n cael ei gyflwyno gan rywun drwg, yn enwedig os ydy ei fwriad wrth ddod ag e yn ddrwg.

²⁸Mae tyst celwyddog yn cael ei dewi; y tyst oedd wedi gwrando sy'n cael y gair ola.

²⁹Mae person drwg yn smalio ac yn bwrw yn ei flaen; ond mae'r person gonest yn meddwl ble mae'n mynd.

³⁰Does dim doethineb na deall na chyngor sy'n gallu ennill y dydd ar yr ARGLWYDD.

³¹Mae milwyr wedi paratoi meirch ar gyfer y rhyfel, ond yr ARGLWYDD sy'n rhoi'r fuddugoliaeth.