Read Gobaith i Gymru Diarhebion 24 Bible Online

Diarhebion 24 - Gobaith i Gymru bible

Diarhebion 24

¹Paid cenfigennu wrth bobl ddrwg, na bod eisiau cadw cwmni iddyn nhw.

²Dŷn nhw'n meddwl am ddim byd ond trais a sut i wneud drwg i bobl eraill.

³Mae'n cymryd gallu i adeiladu tŷ, a deall i osod seiliau cadarn iddo.

⁴Mae angen gwybodaeth i lenwi'r ystafelloedd gyda phob math o bethau gwerthfawr a hardd.

⁵Mae person doeth yn gryf, a person deallus yn ddylanwadol.

⁶Mae angen strategaeth i ymladd brwydr, a digon o gyngor doeth i ennill buddugoliaeth.

⁷Mae doethineb allan o gyrraedd y ffŵl; does ganddo ddim i'w ddweud pan mae'r arweinwyr yn cyfarfod.

⁸Mae'r sawl sy'n cynllunio i wneud drwg yn cael yr enw o fod yn gyfrwys.

⁹Mae castiau'r ffŵl yn bechod, ac mae'n gas gan bobl berson sy'n gwawdio.

¹⁰Os wyt ti'n un i golli hyder dan bwysau, mae gen ti angen mwy o nerth.

¹¹Achub y rhai sy'n cael eu llusgo i ffwrdd i'w lladd! Bydd barod i helpu'r rhai sy'n baglu i'r bedd.

¹²Os byddi di'n dweud, “Ond doedden ni'n gwybod dim am y peth,” cofia fod yr Un sy'n pwyso'r galon yn gweld y gwir! Mae Duw yn dy wylio di, ac mae e'n gwybod; a bydd pawb yn cael beth maen nhw'n ei haeddu.

¹³Fy mab, bwyta fêl — mae'n dda i ti; ac mae diliau mêl yn felys yn dy geg.

¹⁴A'r un modd mae doethineb yn dda i ti. Os wyt ti'n ddoeth, byddi'n iawn yn y diwedd; a bydd gen ti obaith fydd byth yn dy siomi.

¹⁵Paid llechu fel lleidr tu allan i gartre dyn da; a paid torri i mewn i'w dŷ.

¹⁶Gelli faglu pobl dda dro ar ôl tro, ond byddan nhw'n codi ar eu traed; tra mae un anffawd yn ddigon i fwrw pobl ddrwg i lawr.

¹⁷Paid dathlu pan mae dy elyn yn syrthio; paid bod yn falch os ydy e'n cael ei fwrw i lawr,

¹⁸rhag i'r ARGLWYDD weld y peth, a bod yn flin hefo ti; wedyn bydd e'n arbed y gelyn rhag y gosb.

¹⁹Paid digio pan mae pobl ddrwg yn llwyddo; paid bod yn genfigennus ohonyn nhw —

²⁰does dim dyfodol iddyn nhw. Mae'r person drwg fel lamp sy'n diffodd.

²¹Fy mab, dylet ti barchu'r ARGLWYDD a'r brenin, a pheidio cadw cwmni'r rhai sy'n gwrthryfela.

²²Yn sydyn bydd dinistr yn dod arnyn nhw; pwy ŵyr faint o ddrwg allan nhw ei achosi?

²³Dyma fwy o eiriau'r doethion: Dydy dangos ffafriaeth wrth farnu ddim yn beth da.

²⁴Bydd barnwr sy'n gollwng yr euog yn rhydd yn cael ei felltithio gan bobl, a'i gondemnio gan wledydd;

²⁵Ond bydd bywyd yn braf i'r un sy'n barnu'n deg; bydd e'n cael ei fendithio'n fawr.

²⁶Mae rhoi ateb gonest fel cusan ar y gwefusau.

²⁷Rho drefn ar dy waith tu allan, a chael y caeau'n barod i'w plannu, ac wedyn mynd ati i adeiladu dy dŷ.

²⁸Paid rhoi tystiolaeth yn erbyn rhywun heb achos da; a paid camarwain pobl.

²⁹Paid dweud, “Dw i'n mynd i dalu'r pwyth yn ôl! Bydda i'n dial arno am beth wnaeth e.”

³⁰Roeddwn i'n pasio heibio cae y dyn diog, a gwinllan un sydd heb sens;

³¹Roedd drain wedi tyfu drosto, a chwyn ym mhobman, a'r wal gerrig o'i gwmpas wedi syrthio.

³²Wrth edrych a meddwl am y peth, roedd beth welais i yn dysgu gwers i mi:

³³“Ychydig bach mwy o gwsg; pum munud arall! Swatio'n gyfforddus yn y gwely am ychydig.”

³⁴Ond bydd tlodi yn dy daro di fel lleidr creulon; bydd prinder yn ymosod arnat ti fel milwr arfog.