Read Gobaith i Gymru Diarhebion 29 Bible Online

Diarhebion 29 - Gobaith i Gymru bible

Diarhebion 29

¹Pan mae rhywun yn troi'n ystyfnig ar ôl cael ei geryddu dro ar ôl tro, yn sydyn bydd e'n torri, a fydd dim gwella arno.

²Pan mae pobl dda yn llwyddo, mae dathlu mawr, ond pan mae'r rhai drwg yn rheoli, mae pobl yn griddfan.

³Mae'r un sy'n caru doethineb yn gwneud ei dad yn hapus, ond bydd y dyn sy'n cadw cwmni puteiniaid yn gwastraffu ei eiddo.

⁴Mae brenin yn gwneud gwlad yn sefydlog drwy weithredu'n gyfiawn, ond mae'r un sy'n trethu'r bobl yn drwm yn ei rhwygo i lawr.

⁵Mae'r un sy'n seboni ei gyfaill yn taenu rhwyd i'w ddal ynddi.

⁶Mae pobl ddrwg yn cael eu trapio gan eu drygioni, ond mae'r cyfiawn yn hapus ac yn canu'n braf.

⁷Mae gan y cyfiawn gonsýrn am hawliau pobl dlawd; ond dydy pobl ddrwg ddim yn gweld pam y dylid poeni.

⁸Mae'r rhai sy'n gwawdio pobl eraill yn creu helynt, ond mae'r doeth yn tawelu dig.

⁹Pan mae person doeth yn mynd â ffŵl i gyfraith, bydd digon o arthio a gwawdio, ond dim heddwch!

¹⁰Mae llofruddion yn casáu pobl onest, ond mae'r rhai cyfiawn yn eu hamddiffyn nhw.

¹¹Mae'r ffŵl yn colli ei limpyn yn lân, ond mae'r doeth yn rheoli ei dymer.

¹²Pan mae llywodraethwr yn gwrando ar gelwydd, mae ei swyddogion i gyd yn ddrwg.

¹³Mae un peth sy'n wir am y cyfoethog a'r tlawd: yr ARGLWYDD sydd wedi rhoi bywyd i'r ddau.

¹⁴Os ydy brenin yn trin pobl dlawd yn deg bydd ei orsedd yn ddiogel bob amser.

¹⁵Mae gwialen a cherydd yn gwneud plentyn yn ddoeth, ond mae plentyn afreolus yn codi cywilydd ar ei fam.

¹⁶Pan mae pobl ddrwg mewn grym, mae mwy o droseddu, ond bydd y cyfiawn yn gweld eu cwymp.

¹⁷Disgybla dy blentyn i fod yn dawel dy feddwl; a bydd bywyd yn bleserus i ti.

¹⁸Heb weledigaeth gan Dduw does dim rheolaeth ar bobl, ond mae'r rhai sy'n cadw'r Gyfraith wedi eu bendithio'n fawr.

¹⁹Dydy geiriau ddim yn ddigon i ddisgyblu gwas; falle ei fod e'n deall, ond fydd e ddim yn gwrando.

²⁰Mae mwy o obaith i ffŵl nag i rywun sy'n rhy barod ei dafod.

²¹Pan mae caethwas wedi ei sbwylio ers yn blentyn, fydd dim ond trafferthion yn y diwedd.

²²Mae'r un sy'n fyr ei dymer yn creu helynt, a'r un sy'n gwylltio'n hawdd yn troseddu'n aml.

²³Mae balchder yn arwain i gywilydd, ond bydd person gostyngedig yn cael ei anrhydeddu.

²⁴Mae rhywun sy'n helpu lleidr yn elyn iddo'i hun; mae'n cael ei alw i dystio, ond yn dweud dim.

²⁵Mae bod ag ofn pobl yn drap peryglus, ond mae'r un sy'n trystio'r ARGLWYDD yn saff.

²⁶Mae llawer yn ceisio ennill ffafr llywodraethwr, ond yr ARGLWYDD sy'n rhoi cyfiawnder i bobl.

²⁷Mae pobl dda yn casáu'r rhai sy'n gwneud drwg, ac mae'r rhai sy'n gwneud drwg yn casáu'r rhai sy'n gwneud beth sy'n iawn.