Read Gobaith i Gymru Diarhebion 3 Bible Online

Diarhebion 3 - Gobaith i Gymru bible

Diarhebion 3

¹Fy mab, paid anghofio beth dw i'n ei ddysgu i ti; cadw'r pethau dw i'n eu gorchymyn yn dy galon.

²Byddi'n byw yn hirach ac yn cael blynyddoedd da; bydd eu dilyn nhw yn gwneud byd o les i ti.

³Bydd yn garedig ac yn ffyddlon bob amser; clyma bethau felly fel cadwyn am dy wddf, ysgrifenna nhw ar lech ar dy galon.

⁴Yna byddi'n cael dy dderbyn, ac yn cael enw da gan Dduw a chan bobl eraill.

⁵Trystia'r ARGLWYDD yn llwyr; paid dibynnu ar dy syniadau dy hun.

⁶Gwrando arno fe bob amser, a bydd e'n dangos y ffordd iawn i ti.

⁷Paid meddwl dy fod ti'n glyfar; Dangos barch at yr ARGLWYDD a throi dy gefn ar ddrygioni.

⁸Bydd byw felly yn cadw dy gorff yn iach, ac yn gwneud byd o les i ti.

⁹Defnyddia dy gyfoeth i anrhydeddu'r ARGLWYDD; rho siâr cyntaf dy gnydau iddo fe.

¹⁰Wedyn bydd dy ysguboriau yn llawn, a dy gafnau yn llawn o sudd grawnwin.

¹¹Fy mab, paid diystyru disgyblaeth yr ARGLWYDD, na thorri dy galon pan mae e'n dy gywiro di.

¹²Achos mae'r ARGLWYDD yn disgyblu'r rhai mae'n eu caru, fel mae tad yn cosbi'r plentyn mae mor falch ohono.

¹³Y fath fendith sydd i'r sawl sy'n darganfod doethineb, ac yn llwyddo i ddeall.

¹⁴Mae'n gwneud mwy o elw nag arian, ac yn talu'n ôl lawer mwy nag aur.

¹⁵Mae hi'n fwy gwerthfawr na gemau; does dim trysor tebyg iddi.

¹⁶Mae bywyd llawn yn ei llaw dde, a chyfoeth ac anrhydedd yn ei llaw chwith.

¹⁷Mae ei ffyrdd yn llawn haelioni, a'i llwybrau yn arwain i heddwch a diogelwch.

¹⁸Mae hi fel coeden sy'n rhoi bywyd i'r rhai sy'n gafael ynddi, ac mae'r rhai sy'n dal gafael ynddi mor hapus!

¹⁹Doethineb yr ARGLWYDD osododd sylfeini'r ddaear; a'i ddeall e wnaeth drefnu'r bydysawd.

²⁰Ei drefn e wnaeth i'r ffynhonnau dŵr dorri allan, ac i'r awyr roi dafnau o wlith.

²¹Fy mab, paid colli golwg ar gyngor doeth a'r ffordd iawn; dal dy afael ynddyn nhw.

²²Byddan nhw'n rhoi bywyd i ti ac yn addurn hardd am dy wddf.

²³Yna byddi'n cerdded trwy fywyd yn saff a heb faglu.

²⁴Pan fyddi'n gorwedd i lawr, fydd dim byd i'w ofni; byddi'n gorwedd ac yn gallu cysgu'n braf.

²⁵Fydd gen ti ddim ofn yr annisgwyl, na'r drychineb sy'n dod ar bobl ddrwg.

²⁶Bydd yr ARGLWYDD yn rhoi hyder i ti; bydd e'n dy gadw di rhag syrthio i drap.

²⁷Pan mae gen ti'r cyfle i helpu rhywun, paid gwrthod gwneud cymwynas â nhw.

²⁸Paid dweud wrth rywun, “Tyrd yn ôl rywbryd eto; bydda i'n dy helpu di yfory,” a tithau'n gallu gwneud hynny'n syth.

²⁹Paid meddwl gwneud drwg i rywun pan mae'r person yna'n dy drystio di.

³⁰Paid codi ffrae gyda rhywun am ddim rheswm, ac yntau heb wneud dim drwg i ti.

³¹Paid bod yn genfigennus o rywun sy'n cam-drin pobl eraill, na dilyn ei esiampl.

³²Mae'n gas gan yr ARGLWYDD bobl sy'n twyllo, ond mae ganddo berthynas glos gyda'r rhai sy'n onest.

³³Mae melltith yr ARGLWYDD ar dai pobl ddrwg, ond mae e'n bendithio cartrefi'r rhai sy'n byw'n iawn.

³⁴Mae e'n dirmygu'r rhai sy'n gwawdio pobl eraill, ond yn hael at y rhai gostyngedig.

³⁵Bydd pobl ddoeth yn cael eu canmol, ond y rhai dwl yn cael eu cywilyddio.